Ha ka synshar paidbah kaba heh bad kaba lah ban iakhun kum ka India, ka jingshaniah jong ki briew ka long kaba eh ban ioh bad kham eh shuh shuh ban pynneh. Hynrei, wat hapdeng ka jingïakhun saiñ pyrthei kaba man ka por bad ka jingshah bishar bniah ha ki paidbah, u Narendra Modi u la ïai bteng ban ïoh ïa ka jingshaniah jong ki paidbah. Da kaba long u Myntri Rangbahduh ba la jied ban shakri slem tam jong ka India, u la ai ïa ka nuksa kaba thymmai ha ka sain pyrthei synshar paidbah.
Watla ngi wan na ki bynta bapher bapher jong ka India, hynrei ma nga bad u Myntri Rangbahduh ka ri u Modi ngi dei na ka pateng kaba la peit ia ka kam sain pyrthei na ka nongrim jong ka Emergency. Ngi la sakhi hi dalade ia ka jingshah thombor jong ka jinglaitluid ha ka synshar paidbah bad ngi la iashim bynta ha ka jingiakhih kaba ialeh ban pynneh ia ki. Na ka bynta kiba bun na ngi, kata ka jingialeh kam shym la long tang ka jingjia ha ka sain pyrthei hynrei kadei ka jingshem kaba pynlong ia ngi ban sngewthuh ia ka jingim paidbah bad ki jinglong jong ka synshar paidbah.
Da ki phew snem, ka la don ka jingsngewthuh ba ki kam kiba ha khlieh duh ha ka ri ki long tang na ka bynta ki katto katne ngut kiba don hok ne kito kiba la kha ha ki longïing kiba donbor ha ka saiñ hima sima. Ka jingiaid lynti jong u Myntri Rangbahduh u Modi ka la tynjuh ia kata ka jingmut. Da kaba kiew na ka jingsdang kaba rit ban bat ia ka kam ba la jied kaba ha khlieh duh ha ka ri, u la long ka tyllong jong ka jingai mynsiem ia ki million ngut ki samla jong ka ri, khamtam kito kiba na ki longïing kiba duk basuk.
Ka khana jong u ka pynskhem ia ka jingngeit ba ha ka synshar paidbah kaba khlain, ka jingkut jingmut, ka jingtrei shitom bad ka sap ka lah ban jop ia ki jingkhanglad kiba wan na ka jinglong jong ka longiing. Ha kata ka jingmut, kane u mawmer um dei tang ka jingjop shimet, hynrei kadei ruh ka jingpynskhem kaba khlain ia ka bor bad jinglaitluid jong ka synshar paidbah jong ka ri India.
Kum u nongbud jong u Dr Ram Manohar Lohia, u Loknayak Jayaprakash Narayan bad bun kiwei pat ki nongialam Socialist, nga ju peit ia ka sain pyrthei kum ka lad ban pynthikna ia ka bha ka miat jong ki briew. Ka jingiarap ia ki briew ban lait na ka jingduk bad ban im ka jingim kaba don burom kadei ban long ka jingthmu ba kongsan tam jong uno uno u nongialam sain pyrthei. Ha kaba iadei bad kane, u Myntri Rangbah duh Modi u don ka rekod kaba bha. Da ka jingpynleit jingmut jong u ban pynduh jait ia ka jingduk, ka sorkar NDA ka la iarap ban pyllait ia 25 klur ngut ki briew na ka jingduk.
Ki painkhana, ki bank account, ki iing, ki jingpyniasoh gas, ka um kor, ka insurance na ka bynta ka koit ka khiah bad kiwei kiwei ki jingdonkam ba kongsan ki la poi sha ki klur ngut ki briew. Bun ki Scheduled Caste, Scheduled Tribe, ki jaitbynriew ba dang sahdien, ki kynthei, ki longïing kiba duk bad ki nongïoh jingmyntoi ba nyngkong na ki prokram pynroi mynta ki la sdang ban ïohi ïalade kum ki nongïashim bynta ba radbah ha ka khana jong ka jingroi jong ka India. Ki samla ki la shem ia ki lad ki lynti kiba thymmai ban seng kam seng jam lyngba ki skhim ba kyrpang. Ngam artatien ba ka jingwanrah ia kine ki kynhun ha ka lynti kaba kongsan jong ka roi ka par jong ka ri ka la long ka jingpynkylla kaba kongsan tam ha kaba pynthikna ia ka hok ha ka imlang sahlang.
Nga la iohi ruh ia ka jingpeit bniah jong u Myntri Rangbahduh Modi ia ka bha ka miat bad burom jong ki kynthei. Bun na ki skhim jong u ki la ai jingmyntoi beit beit ia ki kynthei bad pynduna ia ki jingeh ha ka jingim jong ki kaba man ka sngi. Ka la long ka jingshem jong nga ha Bihar ba haba ki kynthei ki don ha ka bynta pdeng jong ki sienjam ban pynroi, ka imlang sahlang ka kiew stet. Kam long kaba phylla ba ia ki jingjop jong ka jingpyrshang Jeevika jong ngi ha Bihar mynta la kren ha ka pyrthei baroh kawei.
Hadien ba nga la long u Myntri Rangbah la bun snem, nga tip ia ki jingeh kiba iadei bad ka jingpynthikna ia ka jingpoi jong ki jingmyntoi sha u nongioh jingmyntoi ba la thmu. Tang ki jingthmu babha kim pat biang. Ka jingpyntreikam kaba thikna ka long kaba kongsan. Nga la iohi ruh kumno ka jinglah ban pynkylla ia ki rai katkum ki polisi sha ki jingseisoh ka donkam ia ka jingpeit bniah man ka por, ki jingpynkylla, ka jingpynleit jingmut ia ka jingsynshar bad ka jingpyrkhat bniah.
Ka jinglong kaba kongsan jong ka jinglong nongïalam jong u Myntri Rangbahduh u Modi ka long ka jingpynleit jingmut jong u ban pynthikna ba ka jingsynshar kan pynkylla sha ki jingmih kiba lah ban ïohi na ka bynta ki nongshong shnong. La ka long ha ki skhim na ka bynta ka bha ka miat, ka jingkyntiew ia ki jingdon jingem ne ka jingpynpi ia ka jingshakri sha ki paidbah, u la pynleit jingmut beit ha ka jingtreikam kaba paka, kaba shai bad kaba don ka jingkitkhlieh. Lyngba ka jingpyndonkam ia ka teknoloji, ka jingphah pisa beit beit bad ki lad peit bniah kiba khlain, la pynduna shibun ia ka jingbym iahap hapdeng ka jingthaw bad jingpyntreikam ia ki polisi. Katba ki jingmyntoi jong ka sorkar ki nang poi shuh shuh sha ki briew bad da kaba duna ka jingmushlia, ka jingshaniah jong ki paidbah ha ki jaka treikam ka nang khlain. Ia kane ka jingshaniah la pynskhem shuh shuh da ka jingiatreilang bad jingiakren ba man ka por jong u Myntri Rangbahduh bad ki nongshong shnong, kaba iarap bankyntiew ia ka jingiadei kaba kham khlain hapdeng ka sorkar bad ki paidbah.
Ka jingïaid lynti jong u Myntri Rangbah duh Modi ha ka kam saiñ pyrthei ka kynthup ïa ka jinglong Myntri Rangbah ka Gujarat kaba slem bad kaba jop. Ha ka jingshisha, shen un sa dap 25 snem ka jingshakri kaba iaibteng kum u nongialam jong ka sorkar. Kane ka jingshem ha ka kyrdan jong ka jylla bad ka ri ka la ai ia u ia ka jingsngewthuh kaba jylliew shaphang ki jingdonkam jong ki jylla bad ka jingdonkam ban kyrshan ia ki. Ka jinglong Myntri Rangbahduh jong u ka la paw da ka jingangnud kaba khlain ha ka synshar paidbah kaba iatreilang.
Ha ka por ba nga long Myntri Rangbah, nga la mad dalade ia ka jingkyrshan jong u ia ka roi ka par jong ka Bihar, khlem da khein ia ki jinglong jingman ha ka sain pyrthei. Nga kwah khamtam ban kdew ia ka jingkyrshan kaba phylla kaba ka Bihar ka la ioh ha ka Mang Tyngka jong u snem 2024-25 bad 2025-26 kynthup ia ka jingseng ia ka Makhana Board bad ka jaka pynmih bording ha Bhagalpur, bad ka jingbei tyngka a na ka bynta ban iada na ki jingshlei um bad shibun ki projek pynroi.
U Myntri Rangbah duh Modi u burom bha ia ka kolshor bad ki riti dustur ba kyrpang jong ka Bihar. U la pyni ia ka pateng jong ka Bihar sha ka pyrthei da kaba ai sngewbha ia ki jingdro Makhana, Madhubani bad kiwei kiwei ki tiar na kane ka jylla sha ki riew pawkhmat jong ka pyrthei. Dei ruh u Myntri Rangbahduh Modi uba la pynthikna ba la pynkup burom Bharat Ratna ia u Jannayak Karpoori Thakur, ka jingdawa kaba la slem bha kaba khlem lah ban pynurlong da ki phew snem.
Ka Bihar ka la ioh jingmyntoi na ki katto katne ki projek ba iadei bad ki jingdon jingem kiba heh ha kine ki shiphew snem ba la leit noh. Haba ianujor bad ki shiphew snem shwa u snem 2014, ka jingkyrshan bad ka jingbei tyngka na ka sorkar pdeng ka la kiew bha. Ka jingtei ia ki jingkieng kiba kongsan ha kylleng ka wah Ganga, ka jingpynheh ia ki surok bah jong ka ri, ka jingkyntiew ia ki kad liengsuin bad ka jingkyntiew sted ia ki jingdon jingem ba iadei bad ki lynti rel ki la iarap ban kyntiew ia ka roi ka par jong ka Bihar.
