Ranji Trophy 2024-25: Pynthikna u Jaskirat & Sumit ba ka jingïakhun kan jam sha ka sngi ba saw

Shillong, Kyllalyngkot 25: Ka jingshan skhem jong u Jaskirat Singh Sachdeva bad u Sumit Kumar rangïalehkai ba nabar (guest professional) ha ka tied ka la pynthikna ïa ka Meghalaya ba kan lah ban rah ïa ka jingïalehkai Ranji Trophy 2024-25 Elite Group A pyrshah ïa ka Odisha ban jam sha ka sngi ba saw bad ba khadduh mynta ka sngi.
U Jaskirat u la lah ban ïaineh ha ka tied da kaba kamai 53 ron naki 109 tylli ki bol (6x4s) ha MCA Ground hynne ka sngi Saitjaiñ, ryngkat bad u Wanlambok Nongkhlaw u ba la kamai 19 ron naki 49 tylli ki bol, katba u Sumit u la shah pynkhyllem noh shuwa ban pynkut ka jingïalehkai da kaba kamai 51 ron naki 114 tylli ki bol (6x4s). Ka Meghalaya ka la lah ba kan kynjoh 221 ron bad hap 6 wiket ha ka inning tied kaba ar, bad ka dang sahdien da 129 ron ban pynlong ïa ka liang pyrshah ba kan hap tied biang.
Ka step ka la sdang ha kaba ka Odisha ka la bteng ïa ka tied na ka 523/7 bad ka la tied tang 3.2 over shuwa ban pynkut da 548/7 hadien ba ka la ap ïa u Rajesh Dhuper ban kynjoh ïa ka spah roh (102 not out naki 95 bol). Kane ka mut ba ka Odisha ka la lamkhmat ïa ka Inning ba nyngkong haduh 350 ron ïa ka Meghalaya (kaba la out na bynta ki 198 ron ha ka sngi ba nyngkong).
Ka la long shisha ka jingsdang kaba duh mynsiem ïa ka Meghalaya namar ba lai ngut na ki nongtied ba nakhmat eh ki la khyllem noh khlem da ïoh kamai ron (dugout) bad ka ron ka long tang 31. Hynrei la pynsangeh noh ïa kane ka jingduh jingkyrmen da ka jingiatreilang kaba 51 ron hapdeng u Nishanta Chakraborty (38 ron na 68 bol, 5x4s) bad u u Anirudh B (20 ron naki 29 bol, 2x4s). Baroh arngut ki la shah pynhap noh ha u rangkawangbol pace jong ka Odisha, u Sunil Kumar Roul (3/48), uba dei u nongkawang bol ba seisoh tam ha katei ka sngi.
Ka Odisha ka la khmihlynti ban pynkut noh ïa ka jingïalehkai mynta ka sngi hi hynrei u Jaskirat bad u Sumit, kiba la kamai 43 ron bad 40 ron ha ka inning ba nyngkong, ki la lah ban shan skhem da kaba bynrap 89 ron na bynta u wiket ba 6. Kane ka la pynthikna ba ka Meghalaya kan duh satang u wei u wiket ha kane ka sngi.
Watla kata ruh, ka Odisha ka dang don jingkyrmen ban pynkut ïa u Jaskirat bad u Wanlambok, ban pynthikna ïa ka namjop mynta ka sngi.