Mawkyrwat, Rymphang, 14: Ka Khasi Students’ Union (KSU) jong ka Mawkyrwat Circle ryngkat ka KSU Mawkyllut Unit mynta ka sngi ki la leit ban hiar jurip ïa ka jaka sumar ba 100 jingthiah kaba don ha South West Khasi Hills District bad ha kane ka jingjurip kum ka seng ka la lap bun ki jingduna.
Ïa kane ka kynhun la lamkhmat da u Plosbor Kharjahrin, Finance Secretary jong ka KSU Mawkyrwat Circle bad u Bennyson Shangdiar, General Secretary KSU Mawkyllut Unit ha ryngkat ka jingsynranlang ki dkhot jong ka KSU.
Haba kren ha ki lad pathai khubor hadien ka jingjurip, u Plosbor Kharjahrin, Finance Secretary jong ka KSU Mawkyrwat Circle u la ïathuh ba kane ka jingleit jurip jong ki long hadien ka jingud jingnam jong ki paidbah na kylleng ki jaka kiba wan ban shim jingïarap ban ïoh ki jingpynkhiah na ki jingpang ba ki ki don. Namarkata, ka seng hadien kata khlem da pynslem ka la shim ïa ka rai ban leit jurip bad ban ïa kynduh ruh mar khmat bad ki briew kiba thiah pang ha kaba kum ka seng ka la ïoh ruh ban ïa kren.
“Haba la ïoh ban ïa kren bad ki nongthiah pang, ma ki hi da lade ki la pynsngew ha ka seng ba wat hadien ar bnai duna ba la plie bad la pynïaid ïa ki jingtrei kam ha kane ka jaka sumar shibun bah ki jingduna ki don”, ïathuh u Plosbor. Namarkata, u la kyntu ïa ki bor ba dei jong ka tnad ka koit ka khiah ba ka dei ban pynbiang ïa ki jingdonkam baroh khnang ba ka jingplie ïa kane ka jaka sumar ba 100 jingthiah kan long ka jingmyntoi ïa ki paidbah jong ka dong thaiñ. Ha kajuh ka por u la kyrpad ruh ïa ki nongmihkhmat bad ïa ka sorkar ka ban sa wan ba ka dei ban leh phai khmat mardor ha kane ka jaka sumar ym ban shu plie bad ieh khunswet namar ka koit ka khiah ka long kaba donkam ïa baroh.
Ha kajuh ka sngi na ka liang ka KSU ka la ïoh ruh ka lad ban ïa kynduh markhmat ruh bad u Dr. W. Sutnga bad ïoh ruh ka lad ban ïa phylliew jingmut ïa shibun bah ki kam kiba ïa dei bad ki jingdonkam hapoh kane ka jaka sumar ba 100 jingthiah.
