Plie u CM ïa ka Model Degree College bad ka ïingthymmai jong ka Patharkhmah Govt HSS

Nongpoh, Risaw 12: Ka long ka jingkmen bad ka jingkyrkhu kaba khraw ïaki paidbah ka thaiñ Jirang hadien ba u Myntri Rangbah ka Jylla Meghalaya, u Conrad K. Sangma, mynta ka sngi u la plie paidbah ïaka Patharkhmah Model Degree College, kawei naki college kaba la ap khmih lynti la slem ban ioh plie noh ïaka watla ki klas kila sdang bad kumjuh ruh ka building ba thymmai jong ka Patharkhmah Government Higher Secondary School kaba long ka jingkyrkhu kaba khraw ïaki samla pule khamtam ki kmie ki kpa ba ka sorkar kala lah ban wanrah ki shlem pule kiba paka sha ka thaiñ Jirang baroh kawei.
Haba kren ha kane ka sngi, u Myntri Rangbah u la pynpaw ba ka jingroi ka jylla ka dei ban poi sha man la ki jaka jong ka Meghalaya kam dei tang haki jaka sor hynrei wat shaduh ki kyndon kynshrot jong ka jylla.
U la kdew ba ka jingwan jong ka Patharkhmah Model Degree College kan plie lad ïa ki samla pule ban bteng ïa ka jingpule haka Bachelor degree, khlem da donkam shuh ban leit shaduh Nongpoh lane Shillong, kumba bun naki kmie ki kpa ki shem jingeh ban phah college ïaki khun jngai nala iing don ruh kiba la pynpep noh shiteng por namar ba kim kot bor ban phah ïaki khun sha ki college ba jngai, hynrei ka jingwan ka model degree college kan long shisha ka jingkyrkhu kaba khraw ïakatei ka thaiñ baroh kawei.
U la ong ruh ba tang ha Ri-Bhoi District ka sorkar kala theh kumba 1847 klur eiei ki kam pynroi naduh ki surok, ki lynti ki synkien, ka pule puthi, ka koit ka khiah bad kiwei kiwei.
U Myntri Rangbah u la pynkynmaw ruh ba u la leit ban iuhkjat sha katei ka thaiñ 8 snem mynshuwa ha kaba ki paidbah ki im hapdeng ka jingkordit naka jingbym biang ki surok bad kiwei kiwei ki kam pynroi hynrei sngewkmen ba ha kane ka sngi u la iohi ba ki surok kila iong bad ki kam pynroi kila ieng shaid shaid sha katei ka thaiñ.
“Kane ka dei ka jingsdang jong ka jingkylla bad ka jingangnud jong ka sorkar MDA, ym tang ha Jirang Constituency hynrei haka jylla baroh kawei namar nga kwah ba ka jylla Meghalaya kan long kum ka model state ne ka nuksa ka ban ïalam ïa kiwei pat ki jylla haka ri bad lada ka Meghalaya ka dei ban roi, ki kam pynroi kim dei ban long tang ha sor hynrei na sdang shaduh ki kyndong kynshrot jong ka jylla baroh kawei” la ong u Conrad da kaba bynrap ruh ba ka pule ka puthi hi ka dei ka thong ba hakhmat eh jong ka sorkar, nakata ka daw ka sorkar ka kham pynlut bun haki kam pynroi ban kyntiew ïaka pule puthi ka jylla.
La sakhi ruh ha kane ka sngi da ka jingdonlang u Bah Sosthenes Sohtun myntri ka tnad C&RD, Rona Khymdeit MDC ka Nongpoh, u Bah CVD Diengdoh, Commissioner and Secretary ka tnad General Administration Department (GAD), S.C. Sadhu, Director ka tnad C&RD, u Dr Abhishek Saini Deputy Commissioner ka Ri-Bhoi, u Giri Prasad Superintendent of Police, Vaibhav Anand Sharma, SDO, Patharkhmah Civil Sub-Division, Bah Petalman Thangkhiew sordar ka Patharkhmah, ki riew rangbah, ki ophisar sorkar, ki nongïalam shnong bad kiwei kiwei.