Wan phai biang u Bah RR Marbaniang u rangbah nongïalam ba phet na ka HSPDP

Nongstoiñ, Rymphang, 14: Ki nongïalam ka Hill State People Democratic Party ha ka sngi hatmajai ka 14 tarik Rymphang, ki la pdiang burom pat ïa u bah R.R.Marbaniang na ka shnong Nginïong kaba hap hapoh ka 33 Rambrai Jyrngam Constituency, u ba long uwei u nongïalam barim jong ka party u ba la mih noh naduh u bnai Nailur jong u snem ba ladep.
Ïa utei u rangbah la pdiang burom da u bah Blesstar K.Budnah Secretary ka Election Committee jong ka HSPDP West Khasi Hills ha ka ophis ka jong u kaba don ha Nongkasen, ha ryngkat ka jingïadon lang jong ki nongïalam ba ha khmat jong ka party na ka 33 Rambrai Jyrngam.
U bah R.R.Marbañiang u la ong ba katto katne taïew hadien ba u la iehnoh noh ïa ka kam kum u nongïalam ka party, u la pyrshang ban wad ïa kiwei pat ki seng saiñ pyrthei ban ïatreilang na ka bynta ka election, hynrei um sngew ïahap jingmut satia. U la ong ruh ba u la pyrshang ban ïatrei lem ïa ki kam election bad ka NPP hynrei um sngew ïahap satia.
Haba u la pyrshang ban ïatrei lem bad ka Congress, hynrei ha katei ka party ruh um sngew ïahap satia bad ka la pynklumar ïa ka jingmut jingpyrkhat jong bad u la sangeh noh shisyndon. Nalor kata u la ong ba haba u la pyrshang phai sha kiwei pat ki seng saiñ pyrthei, ki don la ki jong ki jong ki nongrim bad ki mat treikam. Hynrei, na baroh ki seng saiñ pyrthei, dei tang ka HSPDP kaba don ïa ki nongrim kiba skhem kiba ka ri bad ka Jaitbynriew ka donkam.
U la ong ba ha kane ka sien kaba mynta ba u la wanphai biang sha ka party, u don ïa ka thong ban trei shitom kham palat ban ïa kaba u trei mynshuwa, na ka bynta ba ka party ka khie im bad kan ïeng rasong sa shisien pat.