Nongstoiñ, Rymphang, 14: Ka elekshon MLA 2023 ka la hakhmut bad na ki phra ngut ki kyrtong, saw ngut ki kham paw khmat eh ba kynthup ïa u kyrtong ka NPP bah Macmillan Byrsat, na ka Congress bah Gabriel Wahlang, na ka HSPDP bah Sanjied Kynsai Shangrit bad u bah Polestar Nongsiej na ka UDP.
Kiwei pat ba kynthup ïa u kyrtong ba thymmai na ka party ba dang shu kha thymmai ha ka jylla, u dei u bah Bobby Kharshandi jong ka VPP, u kyrtong thymmai na ka party thymmai ha ka jylla bah Macmillan Kharbani, u ex MLA bah Diostarness Jyndiang kyrtong BJP bad u Bah S.Wanniang u ban ïakhun kum u kyrtong shimet.
Kumba long haduh kane ka khyllipmat hi, ka lyer ka kham don sha kitei ki saw ngut ki kyrtong, kata u bah Macmillan Byrsat sitting MLA na ka party NPP, u ba ki paidbah ka Nongstoiñ hi ki la ïohi bad sakhi khambha ïa ki kam bad ki jingtreikam ba u la leh ha ki san snem kum u MLA ba don burom jong ka dong ka thaiñ.
Nangta kumjuh ruh ka lyer sha u bah Gabriel Wahlang sitting MDC na ka seng Congress ka beh bha, ha kaba la sakhi ruh dang shen ha ka jingialang bah jong ka party ha Bishop Hall. Kum ban pynkynmaw ba watla u la shah rem noh tang 60 vote pyrshah ïa u bah Macmillan Byrsat ha ka elekshon MLA 2018. Hynrei ha ka MDC elekshon 2019 u la jop kput pyrshah ïa u kyrtong ka NPP.
Kumjuh ruh watla ka dang dei ka sien ba nyngkong na ka bynta u bah Sanjied Kynsai Shangrit, hynrei ka party ba u ieng ka dei kaba la rim tam bad kaba la jop bun bun phew snem ha Nongstoiñ da u (L) Ma Hoping Stone Lyngdoh, ha kaba ki paidbah hi ki dang pynpaw ba watla u nongïalam um don shuh, hynrei kiba bun ki dang kyndeh mynsiem ïa kane ka party, la ka long ha sor ne nongkyndong, haba ïohi bad ïoh sngew ïa ka sur bad ka kyrteng Maieit Hoping.
Nangta u bah Polestar Nongsiej pat u dei uwei u rangbah u ba lah ban thaw history ha Nongstoiñ na ka party UDP, lada u poi sha ka jingjop ha ka jingïaleh elekshon kaba nyngkong eh ha ka jingim jong u. Kumba long mynta ka lyer ka beh bha sha kane ka party naduh kine ki khyndiat bnai bad ka la sdang na ki jaka sor ka Nongstoiñ. Ha kine ki taiew ba la lah lei lei ka lyer ka la beh wat sha ki jaka kyndong ruh.
Ban ong lypa mano ba jop lane ba kham don jingkyrmen hapdeng kine saw ngut, kam dei satia kaba suk bad batai lypa. Hynrei ban kylli na ki briew jong ki party te kam don jingmut namar ma ki lei lei te wat ki sniang ruh ki la khreh lypa.
Kumta haba pyrshang ban lum jingtip kylleng ki jaka, la ha sor ne nongkyndong, kham bun hi na kito kiba shu peit kai, ki bym da don bynta than, ne kyrsum ha ki kam politik, ki pynpaw ba ka jingïaleh hi ka long kaba jwat bha bad ym lah satïa ban ong mano ban poi sha ka thong.
Don ruh kiba ong ba katkum ka lyer kaba beh, kine kiwei pat kum ka VPP, TMC, BJP bad u kyrtong shimet ruh, ki don la ka jong ka bynta bad ka jinglah jong ki ban pynjop pynrem ïa kitei ki saw party saw kyrtong ba kham don lyer.
Uwei rangbah bym kwah pynpaw kyrteng u ong ba kumba long mynta u snem 2023, ki don palat 40 hajar ngut ki nongthep vote na kane ka Constituency. Lehse ki ban poi thep vote ha ka 27 tarik ki lah ban poi tang hapoh 35 hajar lane tam. Kumta lada shu ïa kheiñ thohmut thohmat, imat u ba ïoh palat 7000 lane 8000 u la jop.
Ka jingkylli ka long shano ki paidbah kin phai ban jied ïa u ban mihkhmat na ka Nongstoiñ sha ïing dorbar thawaiñ ka jylla mynta ka kynti. Da kano ka sur kin jied, hato kin jied da ka sur jong ka Pisa ne da ka sur Blei…?
