Ban bishar bniah haba jied nongmihkhmat, pynlong ka HYC da ka ‘Rai Eh Daw’ politic campaign ha Patharkhmah

0

Nongpoh, Rymphang 14: Kum kawei na ka seng kaba ai ka jingshakri na ka bynta ki paidbah hapoh ka jylla Meghalaya, ka seng Hynniewtrep Youth Council (HYC) mynta ka sngi ka la pynlong da kata ka ‘Clean and Responsible politics campaign’ lyngba ka ‘Rai Eh Daw Campaign’ ha Patharkhmah na kabynta ban pynshai sha ki paidbah halor ka jingjied ïa ki nongmihkhmat da kaba ki hap ban bishar ban pyrkhat sani bad ym ban shu jied matlah ïano ïano kaba ktah kylla pat ïa ki paidbah lada kim ioh shisha ïa kita ki nongmihkhmat kiba don ïa ka jingbor kum kita ki nongmihkhmat paidbah.
Ïa kane ka jingïalap election ban jied janai ïa ki nongmihkhmat la pynlong ha Iew Patharkhmah kaba hap ha Jirang Constituency ha Ri Bhoi District.
Ïa kane ka jingïalap election ban jied ïa kita ki nongmihkhmat kiba don kata ka jingkitkhlieh la ïalam da u President ba rangbah ka HYC, u Bah Robert June Kharjarin, u General Secretary, u Bah Roy Kupar Synrem, u President ka HYC Ri Bhoi, u Bah Hercules Suting bad kynthup ruh kiwei kiwei ki nongïalam na ka District bad ka seng kmie bad na ka District.
Haba kren ha kane ka jingïalang, kitei nongïalam ka HYC ki la pynpaw ba kane ka jingwan ïalap election jongki kam dei satia ba ki ïalap na ka bynta kano kano ka political party ne ki kyrtong bad la pynlong ïa kane ka jingïalang ban ïalap election ka long ban pynsngewthuh ïa ki nongshong shnong ka jylla ba haba ki jied ïa ki nongmihkhmat ha kane ka election ban wan ki dei ban jied da kata ka mynsiem jong ka jingkitkhlieh bad ka jingbishar bniah bad ym ban shu jied ne rai matlah.
Kitei ki nongïalam ka HYC ki la pynpaw ruh sha ki paidbah ba ka bor jong ka pisa ka lah ban treikam bha ha kane ka election 2023 bad kum ki nongshong shnong kiba la shai bad kiba don ka jingkitkhlieh ïa la ka ri bad ka jaid bynriew kim dei ban shu biej tang ha ka bor ka pisa bad ki dei ban da bishar sani ïa u kyrtong uba don shisha kata ka bor kum uta u nongmihkhmat uba lah ban kit ban ban ïa ka eh ka shon jong ka jaid bynriew.
Shuh shuh, ki la pynshai ruh ba kum ki paidbah kiba la don ïa ka hok ban thep vote kim dei ban shu ban beij ïa ki kyrtong kiba wan tang ha ka por election da kaba pyrshang ban shu leh ïa kam isynei ne sam da ka bor jong ka pisa, namar kane ka dei kawei na ka daw kaba ka jingbamsap ka jur bha ha ka jylla, namar naduh ka por ba ki wan ban ïalap election ki shu thied da ka pisa bad ynda ki la jop ruh ki hap ban bamsap ban puroi ïa kaei kaba ki la pynlut ha ka por ba ïalap election, ong kitei ki nongïalam ka HYC.

Leave A Reply

Your email address will not be published.