Haba ka ktien Khasi bad Garo ki la dei ki ktien sorkar: Balei ym pynrung ïa ki ha baroh ki jingïakhun eksam DSC? (John D. Sangma)
Mawkyrwat, Risaw 12 : Ban ïakren halor ki jingeh ba ki samla Garo ki ïakynduh haba ki ïaleh ïa ki eksamin ba la pynlong da ki District Selection Committee (DSC) ha ki District bapher bapher hapoh Ri Khasi-Jaiñtia, ka All Khasi Hills Achik Joint Action Committee (AKHAJAC) ka la pynlong ïa ka jingïalang paitbah ha ka shnong Puksora, South West Khasi Hills District.
U nongïalam ka AKHAJAC, u John D. Sangma haba kren ha ki lad pathai khubor hadien ba la wai ka jingïalang u la ong ba ka rai jong ka sorkar dang shen halor ka jingthung kam ha ki DSC, kaba bthah ban don ka paper Khasi ha ki DSC hapoh Khasi-Jaiñtia Hills bad ka paper Garo ha Garo Hills ka la wanrah ïa ka jingduhnong ïa ki samla Garo kiba shong ba sah ha ki District bapher bapher hapoh Khasi-Jaiñtia Hills bad kumta ka la dawa ba ka Sorkar kadei ban bishar bniah biang sa shisien halor kane ka mat.
“Haba baroh ar tylli ki ktien, kata, ka ktien Khasi bad Garo mynta ki la dei ki ktien sorkar jong ka Meghalaya, balei ym pynrung ia baroh ar tylli ki ktien ha baroh ki DSC ha ka jylla,” la ong u John D. Sangma.
U Sangma u la ong ba kumba ka long mynta ka jingdon briew baroh jong ki jaitbynriew Garo ha Rilum Khasi-Jaiñtia ka long palat ïa ka 4 lak ngut. “Ïa ngi la kha bad ngi la heh la san hangne ha Khasi Hills, shano ki samla jong ngi kin leit ynda ki la pyndep ïa ka jingpule. Ka sorkar ka dei ban sngewthuh ïa kane bad ka dei ban bishar bniah mardor ïa kane ka rai,” bynrap biang u Sangma.
Namarkata, u Sangma u la maham ruh ïa ka sorkar MDA ba ka AKHAJAC kan dang ïai bteng ban pynlong ïa ki jingïalang ha baroh ki shnong ba shong ki jaidbynriew Garo ha Khasi-Jaiñtia Hills ban pan jingkyrshan na ki paitbah halor ka jingdawa jong ki ïa ka hok jong ki samla Garo. U la bynrap ruh ba kane ka dei tang ka jingsdang bad lada ka sorkar kam sngap ïa ka jingdawa ka dei ka hok jong ngi, ban nang pynjur shuh shuh ïa ka jingïakhih.
Ha kane ka jingïalang ha ka shnong Puksora la wan ban ïashim bynta da ki spah ngut ki paitbah na ka jaidbynriew Garo kiba shong basah ha katei ka thaiñ. Kane ka dei ruh ka jingïalang kaba ar kaba la pynlong da ka AKHAJAC hadien ka jingïalang kaba nyngkong kaba la long ha ka shnong Malangkona, West Khasi Hills District dang shen.