Hap ring mynsiem ki paidbah na u pum pum ba mih na ka khyrdop khrong khajna ka sorkar ha Nar-ang

0

Nongpoh, Kyllalyngkot 11: Ym tang ki paidbah ba leit ba wan kiba hap ring mynsiem da ka lyer ba pum pum kaba mih na ka khyrdop khrong khajna ka sorkar kaba don ha Nar-ang harud ka surokbah National Highway-6 ha Ri Bhoi District, hynrei kiba kham shah ktah ki dei ki nongshong shnong ka Shnong Nar-ang bad Pahammawlein kiba hap ban ring mynsiem da u pum pum ba mih na katei ka khyrdop khrong khajana ka sorkar.
Kum ban pynkynmaw, dang ha u snem ba la dep ki paidbah Nongshong shnong ka Nar-ang bad Pahammawlein ryngkat ki nongïalam Seng Bhalang ki la rah da ki placard bad ki Banner ban pyrshah halor ka jingshah ktah ki paidbah na u pum pum ba mih na katei ka khyrdop khrong khajna (Weighbridge) bad dei na ka jingpyrshah ki paidbah la siang rong noh ïa katei ka surok ba rung sha ka khyrdop ba shipor ki paidbah ki la sngap noh, hynrei mynta pat ki paidbah ki la hap ban mad biang kajuh ka jingeh na ka daw ka jingsdang sniew katei ka surok bad ruh ka jingïaid bun ki kali ba kit mar na katei ka khyrdop ka la pynlong ban pynmih ïa u pum pum ba ki paidbah ki hap ban ring mynsiem da ka lyer ba pum pum.
Lah ban ong ruh ba bun ki paidbah ki la pyrshah bad ki la khnium na ka jingmih pum puh na katei ka khyrdop bad kiba bun hi kim lah ban leh ei ei, namar haduh mynta ym shym la don kiba peit ba khmih bad ki bor synshar ruh kim iohi satia kane ka jingeh ki paidbah nongshong shnong.
La ioh jingtip ruh ba ki bor ba pynïaid ïa katei ka khyrdop ki pyrshang hi ban theh um ïa katei ka surok na ka bynta ban ïada na ka jingher ki pump um, hynrei ki theh tang mynstep bad tang shu mih ka sngi ka surok la tyrkhong biang bad ki paidbah pat ki mad jingeh na ka jingshah ktah ha u pum pum.
Haba leit ban jurip ha katei ka jaka, la sakhi shisha ruh ba kane ka jingmih pum pum ka la ktah ïa ka koit ka khiah ki nongshong shnong ha kaba ki hap ban ring mynsiem da u pum pum bad kaba kham ktah wat ha kane ka por tyrkhong kim don jaka wat ban thad jaiñ, namar lada thad jaiñ ïa ki jaiñ ba ki thad la sap da u pum pum ba mih na aktei ka khyrdop khrong khajna ka sorkar.
Kaba kham khtah shuh shuh ba u pum pum u la sop ym tang ïa ki tnum ïing bad u rung ruh wat shapoh ïing kaba ki shem jingeh wat ban bam ban dih ha kaba ïa ka bam ka dih ba ki shet ruh tang shipor la sop da u pum pum.
Kumba la sakhi, kane ka la ktah shisha ïa ki paidbah bad ka long pat kaba sngewsih haduh mynta ym shym la don kita kiba iohi ne lap ïa kane ka jingeh ki paidbah bad na ka daw ka jingbym don kiba shim khia ban ïa kren halor kane ka jingeh ki paidbah ki hap ban mad ïa ki jingshah ktah ban ring mynsiem da u pum pum ba mih na katei ka khyrdop khrong khajana ka sorkar.

Leave A Reply

Your email address will not be published.