Pyntreikam ka sorkar jylla ïa ki skhim ban ïarap ïa ki riewtymmen, ki longkmie bad kiba duna dkhot met

Shillong, K’lyngkot : Ka sorkar jylla ka la ong ba kala lah ban pyntreikam ïa kiba bun bah ki skhim kiba thmu ban aijingkyrshan ïa ki briew kiba kham mad jingeh kum ki riewtymmen, ki briew kiba don jingduna ha ki dkhot met bad ki longkmie ki bym don shuh ïa u nongkyrshan haïing hasem.
“ïa ka jingïarap kaba shisien shisnem la kyntiew na ka T. 6,000 sha ka T.9,000 naduh u bnai Risaw 2022.Mynta ki la don haduh 1.77 lak ngut ki nong ïoh jingmyntoi kiba la ïoh shuh shuh ïa ki lad jingïarap lyngba ka skhim CM-CARE,” ong u kyrwoh ka sorkar.
Na ka liang ka sorkar ka la pynthymmai ruh ha kaba ïadei bad ki rukom treikam jong ka tnat ka koit ka khiah ha kaba kala plie ruh ïa ki lad jingïarap ha kaba ïadei bad ki lad jingsumar lyngba ki health insurance.
Na ka liang ka sorkar ka la ong ba na ka T.2.8 lak ka jingkdup jong ka health insurance ha ka snem 2019, la kyntiew mynta ia kane ka skhim sha ka T. 5.3 lak hapoh jong ka Meghalaya Health Insurance Scheme (MHIS).Nalor kata ka sorkar Meghalaya mynta ka la pyntreikam ruh da ka teknologi ban kyntiew ha kaba ïadei bad ki rukom treikam ha kaba ïadei bad ka koit ka khiah ha ka jylla.
Dang shen la pyntreikam ruh ïa ki rukom pynpoi ïa ki dawai dashin ha ka por kaba biang lyngba ki drone sha kito ki jaka kiba pajih ka jylla. “Ki drone ki lah ban pynpoi ïa ki dawai dashin hapoh ka 30 minit ha ka jaka jong ka 3 kynta lyngba ki lynti ïaid kiba ju pyndonkam,” ong shuh shuh u kyrwoh ka sorkar.
Ha ka por jong ka khlad covid-19, la kyntiew ha kaba ïadei bad ka jingkdup jong ka skhim MHIS khnang ban pynduna halor ki jinglut jingsep jong ki riew shimet kiba shah sumar hapoh ki hospital nalor ka jingpynbeit ha kaba ïadei bad ki dor ki mur jong ka jingsumar Covid hapoh ki hospital shimet.
Ki longkmie ka jylla Meghalaya mynta ki la ïoh ïa ka jingkyrshan lyngba ki prokram kiba kyntiew na ka bynta ki longkmie.Haduh palat ar lak ngut ki longkmie kila ïoh ïa ki jingkyrshan ha ka liang ka sumar sukher.
Nalor kata ka sorkar kala pynïoh ruh ïa ki 80 tylli ki ïingsah na ka bynta ki longkmie shwa ba kin kha khunlung kumjuh 150 tylli ki kali ki ban pynkit ïa ki sha kine ki ïingsah.
Katkum ka sorkar la lah ruh ban weng ïa ki jingeh kiba ïadei bad ki nongtrei Asha kiba ki la ha ki snem kiba la leit noh kum ha kaba ïadei bad ka jingpynslem ïa ki jingsiew bad ka jingbym don fund. “Haduh kumba T.18 klur la lah ban mang bad pyllait na ka bynta ki tulop jong ki Asha. Ha kine ki lai snem ba la dep haduh palat T.80 klur la lah ban mang bad pyllait.Nalor kata lyngba ka teknologi jong kane ka juk la lah ban pynsuk ïa ka rukom siew sha ki Asha kaba shim por tang hapoh ki khyndiat taïew ha ka jaka jong ki bun bun bnai,” ong shuh shuh u kyrwoh na ka sorkar.
Ki jingsiew na ka bynta ki nongtrei Anganwadi ruh kala kham biang haba ia nujor bad ki snem kiba la leit noh.Ki jingsiew honorarium na ka bynta ki Anganwadi ha ki snem ba la dep kalong T. 6000 percent month (central Rs. 4500 + state Rs. 1500), Anganwadi Helpers – T. 2750 shi bnai (central Rs. 2250 + state Rs. 500).Mynta la kyntiew arshah kataT . 7500 shi bnai (central T. 4500 + state T. 3000) and Anganwadi Helpers T. 3250 shi bnai (central T. 2250 + state T. 1000).