Shillong, K’lyngkot : Ka Seng Hynñiewtrep Youths’ Council (HYC) Mawlai Umjaiur unit hynne ka sngi Balang hapoh ka jingïalam u Samla T.Nongrem ka la leit ban noh jingïarap sha ka longïing jong i Kong Martina Nonglang kaba la mad ïa ka jingjia ba sngewsih na ka jingpluh kynsan jong ka ïingsah jong i kaba la jia ha ka step sngi ba Ar namar ka jingthut ha ka liang ka bording ilektrik.
Ha katei ka ïing la shongwai da ki santylli ki rympei ïing, bad baroh ki dei kiba shu im bylla sngi bad kiba sah ha kitei ki ïing baroh ki long 17 ngut.
Kumta na ka liang ka seng HYC hynne ka janmiet ka la leit ban noh synñiang sha kitei ki longïing da u khaw, ki blanket, phan , shini bad kiwei kiwei.
U Bah T. Nongrem haba ai jingkren u la ong ba kum ka kynhun kam kwah ban long tang ki nongpeitkai haba wan jia kiba kum kine ki jingjia ba sngewsih ha ki longïing longsem jong ki paradoh parasnam, bad lyngba ka jingsngew parabriew bad lyngba u synñiang uba rit na ki para dkhot ki la wan ban ïa kine ki jingai kiba rit.
Ha kajuh ka por ula pynpaw pat ia ka jingsngewkmen bad ainguh ïa U Blei Trai kynrad namar ha kane ka jingjia kaba triem kam shym la don satia kano kano ka jingjia ba sngewsih sha ka liang ki mynsiem briew.
Shuh shuh ha kane ka sngi la synran lang ïa ka Umjaiur unit da u Samla Enlang Sawian bad u Bah Donboklang Kharlyngdoh HYC Mawlai circle. Kane ka long katkum ka kyrwoh ba la phah da u General Secretary u Bah D. Sun.
