Shillong, K’lyngkot : Ka jingïakynduh lang jong ka Seng Kur Lyngkhoi kiba don hapoh ka Bri U Hynñiewtrep ha ka 4 tarik Kyllalyngkot 2023 hapoh Bishop Hall Nongstoiñ West Khasi Hills District, ka la long kaba ïaid beit ïaid ryntih bad kaba shongkun.
Na ka liang u Publicity Secretary ka Seng Kur Lyngkhoi SengKmie u Bah JJ Lyngkhoi lyngba une u kyrwoh ula ong ba kane ka jingïalang ka la long kaba i shongkhia haduh katta katta watla ka dang dei ka sien pynlong kaba nyngkong ha kaba da ki hajar ngut ki para kur ki la poi sha kane ka jingïalang, kata naduh ki Tynmen ki san, ki Samla ki longkmie ki longkpa haduh ki khunlung ki khynnah na kylleng ka Bri u Hynñiewtrep.
Ka jingpynlong ïa kane ka jingïalang jong ka Kur Lyngkhoi ka long kum shibynta ban lum ban lang ïa baroh ki para kur Lyngkhoi kiba don hapoh ka Bri u Hynñiewtrep Hynniewskum bad ban wanrah ka jingïatylli ka jingïaithuh ithaw hapdeng ki para kur.
Ha kane ka sngi la ïoh ruh ban pyllait ïa ka kot riti treikam bad pynïaid kam jong ka Kur Lyngkhoi ha kaba la pyllait da i Tbn Khranglin Lyngkhoi i ba dei ruh i adviser jong ka Kur Lyngkhoi SengKmie.
Kumjuh la ïoh ruh ban pynskhem ïa ki Nongkitkam jong ka Kur Lyngkhoi SengKmie na ka bynta ka samoi treikam 2023-2025, bad la pyntian smai ïa ki nongkitkam da i Tbn Tyran Lyngkhoi Adviser jong ka Kur Lyngkhoi SengKmie.
Ha kane ka jingïalang kum ka kur Lyngkhoi ka la lah ban pynlong ïa buntylli ki program bapher bapher lyngba ki dkhot jong ki para kur na ki Circle bapher bapher. Nalor kata la ïoh ruh ka jingkren maitphang halor ka jingïaid lynti kum ka Seng Kur Lyngkhoi na u Ma Spailar Lyngkhoi uba dei u President ka Seng kur Lyngkhoi SengKmie kumjuh na ba bun kiwei pat ki nongkren bad ki nongïalam na ki District bapher bapher.
Shuh shuh ha kane ka jingïalang la ïoh ban ïathir bad ïamir jingmut sani bha ha kaba ïadei bad ki kam kur Lyngkhoi bad kumno ba yn nang lah ban kyntiew ïa ka Kur Lyngkhoi baroh kawei. Na ka liang la Seng kur Lyngkhoi SengKmie ka shim ruh ïa kane ka kabu ban ai khublei ïa baroh ki para kur Lyngkhoi kiba la ïa poi lang ha kane ka jingïalang ha Nongstoiñ.
Ha kajuh ka por ka seng kala pynpaw ruh ba kane ka dei tang ka jingsdang bad ka kyrmen skhem ba kin nang trei shitom khnang ba kin lah shuh shuh ban pynurlong ïa ki jingthmu jong ka Seng nangne shakhmat namar haba im ka kur im ka Jaitbynriew.
