Plie u Lahkmen Rymbui ïa ki shnat treikam bapher bapher ha Nongtalang College bad Nongtalang SS

0

Jowai, K’Lyngkot 11: U myntri ba peit ïa ka tnad pule puthi, ka kam pohïing ka jylla bad kiwei de mynta ka sngi ula wan ban plie ïa ki saw tylli ki mawnongrim kata ïa ka Science Block, ka Academic Block, and Library Block ka Nongtalang College bad kumjuh ïa ka Administrative Building Cum Auditorium jong ka Nongtalang Govt. Secondary School, Amlarem Block West Jaiñtia Hills District.
Ïa ka jingïalang ha kane ka sngi la pynlong ha phyllaw jong katei hi ka College thymmai (Permanent Campus) kaba don ha Kyrmia Jongiaw, Nongtalang ba la pynïaid da Dr. Solony Bareh bad Dr. Spainlinmi Lapasam ha ka jingdonlang u Principal Nongtalang College bah Ryan R. Kharkongor, u H.L. Giri President ka Governing Body, ma Min Lyngdoh Waheh Shnong ka Nongtalang Village, u ma Khyllaw L. Giri Headmaster, Nongtalang Secondary School, kiwei de ki riew rangbah ka thaiñ, ki nonghikai bad ki khynnah skul.
Na ka liang u kongsan uba dei ruh u MLA ka thaiñ ma Lahkmen Rymbui haba ai jingkren ha kane ka sngi ula ong ‘lada baroh kine kim dei kiba wan na U Trai kim lah satia ban urlong”, ym lah ban klet naduh u snem 1988 ba ka seng ïa kane ka College bad ha u snem 2005 ula pynïasoh bad kane ka College kumta la pyrshang katba lah ban wad ki lad ki lynti na ka sorkar da kaba leit mih wat shaduh Delhi ban pynïoh ka jingithuh ïa ka College.
Hadien kane ka College kala ïoh syndon ban rung hapoh ka Rashtriya Uchchatar Shiksha Abhiyan (RUSA) 1.0 bad ka jingthmu jong ka RUSA ka long ban ai jingïarap ïa ki College ha ki jaka ba ki don, kum u MLA ka thaiñ ula pyrshah ban ïakhun naka bynta ka jingbha jong ka Nongtalang College uba la eh syndon ïa ka kam President jong ka College khnang ba kine ki jingmyntoi jong ka Collage kin urlong da ka jingïarap jong u kum u Myntri sorkar.
Ula ïathuh hashwa ba un long u Myntri na ka liang ki nongtrei jong ka NAAC kila wan jngoh ïa ka College hynrei da ka jingtrei shitom jong ki bor pynïaid ka College kala ïoh ïa ka Grade-B kaba dei ruh ka sien ba nyngkong na ki College kiba don ha ki thaiñ nongkyndong. Hadien nangta kala poi ka por ban rai sa ka People College ïa kane ka College kaba la shim por da ki katto katne snem, lyngba ka jingïarap u Myntri Rangbah ula monjur ïa ka Nongtalang kum ka People College ha kaba la sanction haduh 40 tylli ki post.
Ula pynsngew ruh ïa ka jingdonkam jong ka Nongtalang College ban don ïa ka Commerce Stream, u Myntri ma Lahkmen ula pyntikna lyngba ka kynhun myntri kaba la long mynta ka sngi yn mang kumba 5 tylli ki post ha ka jinglut kaba 50 lak tam ha ka shisnem.
Shuh shuh ula ong kum u nongmihkhmat ka War Jaiñtia u don ka jingangnud ban pynkiew ïa ka pule puthi sha kine ki thaiñ jong ka Amlarem Sub-Division, khnang ba kan pynsuk ïa kiba duk ba rangli kiba donkam shisha ka jingïarap namar ki don ki por ba ki samla pule ka thaiñ kim kot shuh ka bor ban leit pule shabar jong ka District bad kumjuh sha kiwei de ki jylla jong ka Ri.
Kumba long mynta ka Nongtalang College ka long kaba la biang nadong shadong kum kawei na ki College kiba don ha ki thaiñ nongkyndong, kumba long mynta ka don ruh ïa ar tylli ki Bus ki ban kham pynsuk ïa ki samla pule ban poi sha ki College kum na ki thaiñ Dawki bad kiwei de.
Ula kyntu ruh ba ka por kala poi ban jied noh ïa ki nongmihkhmat MLA, kum ki paidbah nongshong shnong (constituency) ki dei ban long kiba stad ban jied kino ki nongmihkhmat kiba trei na ka bynta ka jingbha jingmiat bad ka roi ka par jong ka Constituency hi baroh kawei.
La pynsngew da ki nongpynïaid kane ka College la seng nongrim ïa ka da ka bor Pyllun jong ka shnong naduh 1988, hynrei ha ka snem 1990 la wan ban buh mawnongrim ïaka da u myntri rangbah ba rim ka jylla bam kwai ha dwar u Blei u Salseng C Marak.
Hynrei katba nang mih ki sngi kane ka College kala nang kiew shaphrang ha ka liang ka jingai jingnang jingstad ïa ki samla pule bad dei ha une u snem 2022 ka result kala poi shispah na ka shispah haka kyrdan 10+2 bad Degree Level.
La pynphuh shuh shuh ïa kane ka sngi da ki jingrwai na ki samla pule ka Nongtalang College bad ki jingshad tynrai na ka Nongtalang College (Kelang), katba ïa ki kyntien ai khublei la ïoh na u ma Kmen Myrchiang Secretary Governing Body.

Leave A Reply

Your email address will not be published.