Pynkha tnat treikam ka EJNC ha Elaka Nongkhlieh

0

Khliehriat, Kyllalyngkot 11: Ka East Jaiñtia National Council, hynnin ka sngi ka la ïoh ban pynkhah shuh shuh ïa ka shnat treikam jong ka seng sa ha ka thaiñ Elaka Nongkhlieh kaba la tip kum ka East Jaiñtia National Council Nongkhlieh Circle, ha katei ka sngi la ïoh ruh ban jied bad pynskhem ïa ki nongkitkam bad ki dkhot jong ka Circle bad kane ka Circle ka kynthup ïa ki khatwei tylli ki shnong, ïa ka jingialang la pynlong ha shnong Moolasngi Nongthymme.
Katkum u kyrwoh, la ong ba ka jingthmu jong ka seng haba pynkha ïa kane ka shnat treikam ka long ban ai ka shakri ïa ka thaiñ, ban peit ïa ka eh ka shon jong ki nong shong shnong, ban wanrah ïa ka bha ka miat, ka roi ka kiew ha ka imlang ka sahlang, ïa ki nongkitkam bad ki dkhot jong katei ka Circle la pynskhem bad pyntian smai da u General Secretary jong ka EJNC-CEC, u bah Nangjan Dkhar
Ha ka jingkren jong u General Secretary ka Sengkmie, u la ban jur ïa ka jingdonkam jong ka Jaidbynriew ban ïa tylli lang kawei na ka bynta ban ieng ïaleh ïa ki jingeh ki ba kum jong ka Jaidbynriew kiba ju ïa kynduh ha kine ki sngi, ki por, u la ai mynsiem ïa ki nongïalam bad ki dkhot da kaba ong ba “Kam pher wat lada dei kiba na kano kano ka kyndong kynshrot jong ka thaiñ ruh, hynrei na ka bynta ka dawbah jong ka Jaidbynriew ngi dei ban ïa mih ha madan lada ka kam bad ka por ka dawa bad dei halor kane ba ka seng hi ka pyniar ïa la u tnum u tyndai bad leit sha kylleng sawdong ka Ri lum Jaiñtia ban pynmih ïa ki shipai jong ka Jaidbynriew ba lada ka por ka dawa ngin ïa mih ban ieng ïaleh ïa kino kino ki bor ki ba thmu ban wan ïuhroit bad pynduh jait ïa ngi kum ka Jaidbynriew ba kyrpang”
Kumjuh ruh, u President ka EJNC jong ka Sumer Circle, u samla Sakilan Chyrmang, u la ai ki kyntien kyntu kympham bad maitphang ruh halor ka nongrim ba ka seng ka ieng bad ki riti treikam bad ong ba ka jingthmu ba kongsan eh jong ka seng ka long ban ïada, ban pynneh pynsah, ban kyntiew bad khamtam eh ban ialyeh khlem kynran dien na ka bynta ki sap ba kyrpang jong ka jaidbynriew.
Ïa ka jingïalang la pynïaid da u General Secretary EJNC, u samla Mebanteilang Sukhlaiñ.
Ki nong kitkam jong ka East Jaiñtia National Council Nongkhlieh Circle, kiba la jied bad pynskhem ha katei ka sngi ki kynthup, u President, u bah Nikki Sutnga, Vice President, u bah Wadbor Tariang, General Secretary, u bah Efficiency Phyrngap, Assistant General Secretary, u bah Nikki Dkhar, Organising Secretary, u bah Amut-i-me Sukhlain, Assistant Organising Secretary, u bah Wan-oo Sukhlain, Education Secretary, u Hame Rupon, Finance Secretary bad kiwei kiwei.

Leave A Reply

Your email address will not be published.