Hakhmut kali sahkut u rangbah ba shah tynrah ha Umran, shah bret hapdeng ka jingmynsaw

0

Nongpoh, K’Lyngkot 12: Uwei u rangbah u la mynsaw jur hadien ba u la shah tynrah ha kawei ka kali bym lah ban tip ïa u nombar katba u dang u dang thmu ban jam na shiliang sha shiliang ka surok ha ka thaiñ Umran Dairy.
Katkum ka khubor ba la ïoh lum na ki Pulit, la ïathuh ba kane ka la jia hapdeng ka por 7:00 baje haduh 7:30 baje mynstep ha kaba une rangbah ba la tip kyrteng kum u Balaram Podder 56 snem ka rta na ka jylla West Bengal u dang wankai bad la ki paralok sha ka jylla Meghalaya da kawei ka Bos Night Super bad ka bos ka la sangeh ha Umran Diary ban bamja.
Dei ha kum kane ka por, ba u Podder u dang thmu ban jam sha shilliang jong ka surok u la shah syllad ha kawei ka kali bym lah ban tip ïa u nombar bad kaba dang kiew sha nongbah Shillong.
U Podder hadien ba la shah tynrah u la sahkut hakhmut jong ka kali bad u nongñiah jong ka kali um shym la pynïeng satia ïa ka kali hynrei la kit syndon ïa u sha ki bynta jong ka surok shnong Nongthymmai bad la bret ïa u harud surok hapdeng ka jingmynsaw bad ka kali ka la phet krad na kane ka jaka.
Hadien ba la lap ïa u Podder hapdeng ka jingmynsaw la pynkit noh mar mar sha Umsning CHC ban ïoh ïa ka jingsumar. Hynrei namarba ka jingmynsaw ka la kham jur la pynkit noh ïa u sha Shillong Civil Hospital.
Ki Pulit ki la pyrshang ban thwet bad ban lapdien ïa ka kali kaba tynrah ïa u Balaram Podder hynrei kim shym la lap satia bad ka jingtohkit halor kane ka jingjia ka dang ïaid shakhmat ban lap dien ïa ka kali.

Leave A Reply

Your email address will not be published.