Nongpoh, Nohprah 20: Kum ka jingangnud ban pynneh pynsah ïaki riti dustur, ki riam tynrai, ka shad ka rwai bala buh naduh u mynbarim bad khamtam ka thaiñ ka wet ba ka thaiñ Umden Nongtluh ha Ri-Bhoi ka dei kawei naki jaka ba pawnam haka kam thaiñ jaiñ kala ioh nam ruh kum ka Eri Silk Village, ka Nongtluh Eri Farmer Association (NEFA) sa shisien pat haka sienjam ba 4 kala ioh ban pynlong biang ïaka tamasa Ri Kunai la Tynrai kaba la pynlong ha Umden.
Lyngba katei ka tamasa ka long ruh ka khubor sha ki khun samla halor ka jingdonkam ban pynneh pynsah ïala ka kolshor tynrai, ba kim dei ban duh ban dam noh, hynrei ban dang kyntiew bad pynphriang pateng la pateng.
Ha kane ka sngi la sakhi lang ruh da ka jingdon u MLA ka Nongpoh u Bah Mayralborn Syiem, u Bah Balajied Rani MDC Nongpoh, u Father Glorius Syiemlieh Parish Priest ka Umden Parish, ki nongïalam ka NEFA ba kynthup ïaka kong B.Mallai kum ka President jong ka NEFA, bad kiwei kiwei ki riew rangbah, ki longkmie longkpa lem bad ki khun samla jong katei ka thaiñ.
Haba kren ha katei ka sngi kum u kongsan naka liang u Bah Mayral Born Syiem MLA ka Nongpoh u la ai ka jingïaroh ïaka NEFA kaba la lah ban pynlong ïa katei ka prokram wat la ka long kaba rit hynrei ka dei ka prokram kaba don jingmut bad shongkun namar donkam ban pynneh pynsah ïaki riti dustur bad ki tynrai bala buh naduh u mynbarim bad ki longshuwa manshuwa kaba long ruh kum ka jingkyrsiew thiah ïaki khun samla ba kin tip bad nang ïaka kolshor bad ka tynrai lajong.
U la ai ruh ka jingïaroh ïaka seng ki nongthaiñ jaiñ ha katei ka sngi wat la ki dei ki longkmie hynrei ki lah ban pynlong ïa katei ka prokram kaba kongsan kaba donkam ban hikai pateng la pateng ban neh ka tynrai deiti lajong ban im ka jaitbynriew bad ka dustur, khamtam ka thaiñ Umden Nongtluh ka dei ruh kaba pawnam halor ka jingpynmih ïaki jaiñ ryndia bala ioh nam ruh kum ka Eri Silk Village.
U la kyntu ruh ïaki longkmie ha katei ka sngi ba kin dang pynmih shuh shuh u ksai ryndia naka bynta ban thaiñ ïaki jaiñ ryndia kumba ki dei ki jaiñ kiba shongkun bad rem dor jong u khasi, ba kin dang lah ruh ban kiew shaphrang haka kam thaiñ jaiñ kaba long kawei naki kam ba ai jingmyntoi bad kyntiew ïaka ioh ka kot jong ki paidbah.
La pynshongkun ruh ha katei ka tamasa da ki jingrwai bad jingshad tynrai bala shim bynta da ki longkmie bad kumjuh ki samla ka thaiñ Umden Nongtluh.
