Ai jinghikai ka tnad Water Resourcer halor ka jingpyntreikam ïa ki Hydromet Station

Jowai, Nohprah 20: Ka tnat Water Resources jong ka West Jaiñtia Hills District mynta ka sngi kala pynlong ïa ka prokram kaba ïadei bad ka jingai jinghikai ne ka jingpynsngewthuh sha ki tnat sorkar bapher bapher bad ruh sha ki paidbah nongshong shnong halor ka jingpyntreikam ia ki Hydromet Station ha ki wah kiba don hapoh ka District.
Ïa kane ka prokram la pynlong ha Community Hall jong ka shnong Khimusniang, ha kaba la wan ban iadonlang ki Wahehshnong na ki shnong bapher bapher, ki tnat sorkar bapher kum na ka PHE, na ka ophis u Deputy Commissioner ka West Jaiñtia Hills District, ki riew paidbah bad ki shah khot sngewbha.
Na ka liang jong ka tnat Water Resource kala pyntip ba kane ka prokram ka dei kaba la mang da ka sorkar India hapoh ka National Hydrology Project ïa ka ban pyntreikam ha ki jylla bapher bapher hapoh ka ri. Hapoh ka jylla Meghalaya ïa kane ka projek la ai ban pyntrei da ka Water Resources Department. Haba pyntreikam ïa kane ka projek ka sorkar ka la jied 25 tylli ki wah ban buh ïa kine ki Hydromet Station bad napdeng kine la jied 3 tylli ki wah hapoh West Jaiñtia Hills District kiba kynthup ia ka wah Myntdu, ka wah Umiurem bad ka wah Myntang.
La ïoh ka jingpynshai sha ki paidbah lyngba i kong Junecy Lyngdoh iba dei i Superintending Engineer (HPD) iba la batai ba ka jingthmu haba shna ïa kine Hydromet Station ka long ban peit thuh bad lum jingtip ïa ka jinglong jingman jong ki um ki wah, ka ïarap ruh ban peit ïa ka jinglong jingman jong ka mariang. Ka jingdon jong kine ki projek kan ïarap shibun ïa ki nongshong shnong kiba don ka jingïadei bad ki um ki wah, kan ïarap ban ai jingtip ïa ki shaphang ka jinglong jingman jong ki um ki wah khnang ban tip ban ïada na ka jingshah pynjulor bad kiwei de.
Khamtam la kyntu ïa ki paidbah nongshnong shnong ban ïada na ka jingpynjulor ïa ki tiar ki tar kiba buh ha katei ka jaka treikam.
Na ka liang ka tnat West Jaintia Hills,Water Resouces Department mynta ka sngi kala pynkup burom ruh ïa u Dr. Hermon Khonglah uba la ai sngewbha ïa kane ka tnat ban ïoh tei ïa ka ïing treikam jong katei ka Projek harud jong ka Wah Myntdu kaba don ha ki bynta jong ka Treiongriang.
Kiwei de kiba la ai jingkren ha kane ka sngi ki kynthup ïa ka kong D.D. Syngai, MCS, Addl. Deputy Commissioner, West Jaintia Hills District, u Executive Engineer ka WR u bah P. Kurbah, u President ka Synjuk ki Waheh Shnong Jowai u ma Alan Niangti, u ma L.Khroo Pariat President ka Khooid Ya Ka Wah Myntdu, Dr. Hermon Khonglah bad kiwei kiwei kiba la ban jur halor ka jingdonkam ban pynneh pynsah ïa ka bha ka miat jong ka Wah Myntdu kaba dei tang ma ka hi ka wah kaba bsa ïa ki hali pynthor bad ai um ïa ki nongshong shnong jong ka nongbah Jowai bad ki shnong ba marjan.