Haduh 103.71 klur mang pisa ban shna ïa ka NGWSS ha Nongpoh

Nongpoh, Nohprah 04: Ka long ka jingkyrkhu bad ka jingmyntoi kaba khraw ïaki nongshong shnong jong ki 20 tylli ki shnong haka thaiñ Nongpoh kiba hap haka Census Town hadien ba u Myntri ka tnad PHE u Bah Renikton Lyngdoh Tongkhar mynta ka sngi u la leit ban buh ïa u mawnongrim ban shna ïaka Nongpoh Greater Water Supply Scheme (NGWSS) kaba dei ka skhim um bam um dih ban pynpoi sha man ki thliew iing ha ki shnong ka thaiñ Nongpoh haka jingïalang kaba la long ha District Library ha Nongpoh.
Ïa katei ka Nongpoh Greater Water Supply Scheme la mang pisa haduh 103.71 klur da ka Jal Jeevan Mission lyngba ka Ministry of Jal Shakti jong ka sorkar pdeng bad kumjuh ruh naka sorkar jylla, da ka thong ban pynpoi um ha man la ki thliew ïing, namar kumba long baroh shi katta bun ki shnong ba hap haka Census Town kim ioh ïaka umbam umdih kaba biang namar ba ym lah ban pynrung ïa katei ka skhim bala ju mang kyrpang tang haki shnong nongkyndong, bad bun naki paidbah ki mad jingeh naka jingkyrduh um.
Ha katei ka sngi ka jingbuh ïa u mawnongrim la sakhi ruh da jingdonlang u Bah Mayral Born Syiem MLA ka Nongpoh, Bah Balajied Ranee MDC, u Syed Md. Andaleeb Razi Commissioner & Secretry PHED, ka kong BM Lyndem Chief Engineer ka tnad PHE ka jylla, Bah U Kurbah EE ka tnad PHE Nongpoh Division, ki ophisar bapher bapher naka tnad PHE, ki nongïalam shnong bad kiwei kiwei ki riew rangbah.
Haba kren ha katei ka sngi naka liang u Bah Renikton Lyngdoh Tongkhar u la pynpaw ka jingsngewkmen kaba khraw halor ka jingurlong katei ka skhim bad ai khublei ïaki ophisar ka tnad PHE ba dei lyngba ka jingtrei shitom jong ki naduh u nongmihkhmat bala lah ban pynurlong ïa katei ka skhim umbam umdih ha Nongpoh kaba dei ka thong jong ka sorkar kmie bad kumjuh ruh ka sorkar jylla ban pynbiang umbam sha ki paidbah da ka thong ban pynpoi sha man ki thliew ïing.
U la ong ruh ba tang kumba 4550 tylli ki longïing ki ioh um naki kor um jong ka tnad PHE ha shuwa ban sdang ïaka JJM bad ngi sngewkmen mynta kumba 2.80 lakh ki longïing kiba ioh um, kane ka dei ka jingjop kaba khraw jong ka sorkar watla ngim pat kot lut kumba la angnud ban pynpoi um, bad kumba long mynta ka sorkar jylla kala ioh lut ki jingpynmang pisa na ka skhim JJM ha ka jylla.
“Ha kaba ïadei bad ka jingpyntreikam ïaka skhim JJM haki jaka khap sor, nga la trei shitom shisha bad nga la phah ruh da ka jingthoh 2 sien sha u myntri ka tnad Jal Shakti ban buh ka jingkyrpad naka bynta ban pyntreikam ruh ïa ka skhim JJM haki khap sor, kumba bun naki shnong ki mad jingeh ha kaba ïadei bad ka jingkyrduh um bad napdeng ki myntri ka tnad shatei lam mihngi, dei tang manga u ba la pynmih ïa katei ka mat ba ki shnong haki khap sor ruh ki dei ban ioh ïaka umbam umdih lyngba katei ka skhim” la ong u Bah Renik da kaba bynrap ruh ba ka long pat ka jingkmen kaba khraw ba ka sorkar pdeng kala sngap ïa katei ka jingkyrpang da kaba pynurlong ïa katei ka skhim bala lah syndon ban buh mawnongrim mynta ka sngi ha Nongpoh.
Na ka liang u Bah Mayral Born Syiem kum u MLA haba kren ha katei ka sngi u la ong ba naduh ba u la shimti ïaka kam kum u nongmihkhmat ka thaiñ u la pyrshang ban pynsngew sha ka sorkar bad buddien ïaka skhim umbam umdih haka thaiñ Nongpoh, kumba bun naki shnong ki don hapdeng ka jingeh kaba khraw naka jingkyrduh um namar ka Nongpoh Combine Water Supply Scheme kaba don mynta kam lah shuh ban pyndap um haki shnong ka thaiñ Nongpoh namar ka don tang kawei ka Treatment Plant kaba don ha ka shnong Iewmawlong, hynrei ka long pat ka jingkmen kaba khraw ba lyngba katei ka skhim ba thymmai yn sa lah ban pynbiang umbam umdih lut sha man ki thliew ïing jong ki 20 tylli ki shnong ka thaiñ Nongpoh.