Shillong, K’Lyngkot: Ki la don sanngut ki nongshna bad ki nongthaiñ kti kiba la ïoh pdiang ïa ka khusnam ‘State Award Scheme for Handicraft Artisans’ 2021-2022, ha ka jingïalang kaba la long hynne ka sngi hapoh Conference Hall, Directorate Commerce & Industries, Lower Nongrim Hills, Shillong ha ka jingïadonlang u Bah MR Synrem, IAS, Commissioner & Secretary, Commerce & Industries Dept kum u Kongsan.
Kane ka jingsam khusnam ka dei ruh ka sien kaba hynriew naduh ba la sdang ïa ka ha ka snem 2015-2016.Ka jingthmu ba kongsan jong kane ka jingsam khusnam na ka bynta ki nongshna bad ki nongthaiñ kti ka long ban ithuh halor ki sap ki phong ki jong ki ha kaba ïadei bad ka jingshna ïa ki jait tiar ne ki jingthain bapher bapher.
Ki jingmyntoi lyngba ka jingshah jied ha kane ka ‘State Award’ ka long ba ki lah ban ïoh ia ka lad jingïarap lyngba ki skhim bapher bapher na ka ophis jong ka tnat Development Commissioner (Handicrafts) Ministry of Textile ka sorkar India.
Baroh ki don haduh 43 ngut ki nongwan ïashim bynta na ki district bapher bapher na ka bynta ban ïoh pdiang ïa kane ka khusnam ha ka snem 2021-2022, bad ki nongwan ïashim bynta ki kynthup naduh ki nongshna bad nongthaiñ kiba pyndonkam da ki siej, ki shken ha kaban shna ïa ki pla, ki jingdeng, ki jingbuh jingsat, ki tiar tem tiar put bad kiwei kiwei.
Kine ki sanngut kiba la ioh pdiang ïa kane ka khusnam kaba da ka pisa mar T.50,000 ha ryngkat ki syrnot bad ki jingbuh sahkynmaw kiba don ïa ka shap jong ka sorkar ki kynthup ïa u Bah Dlarson Byrsaw uba dei na ka shnong Kenbah, Mawsynram, EKHD, I Kong Helme Shylla na ka shnong Tyrshang, Ummulong, WJHD, Bah Kalbok Mawthoh na ka shnong Thangsning, EKHD, Kong Previan Lapasam na ka shnong Sohkymphor Nein, Wapung, EJHD bad u Chiangbarth N Marak na 10 Reserve Gittim, PO Baghmara, SGHD.
Nalor kata na ka liang ka sorkar kan pyrshang ruh ban pynïoh ïa ki jingïarap pisa na ka bynta ban shna ïa ki jaka treikam, ki jaka buh ïa ki tiar, ki jaka die kumjuh ki jaka ban pynïaid ïew ïa kine ki tiar nalor ban kyntiew ïa ki sap na ka bynta kiwei pat ki nongshna bad ki nongthaiñ kti kiba don marjan jong kine ki nongïoh khusnam.
