Khliehriat Kyllalyngkot 04: Ka Dorbar Shnong Moolamylliang, East Jaiñtia Hills District, kaba ju pynlong man la u snem ïa ka tamasa pynthaba rong ding (Light Festival or Chrismas/New Year Lights Extravaganza) kaba ju pynlong man la u snem, mynta ka kynti la pynkut noh ïa kane ka tamasa myn hynnin ka miet jong ka 3 tarik u kyllalyngkot 2023, ha kajuh ka por ka Dorbar Shnong Moolamylliang ka phah ïa u kyrwoh ai khublei snem thymmai ba suk ba kmen ïa baroh tat haduh ban da ïa kynduh biang.
U Waheh Shnong Moolamylliang, u bah Apmon Pashiang, u la ïathuh ba ka jingwan poi ki briew sha kane ka tamasa ka la nang kiew ha une u snem ha kaba da ki hajar ngut ki ju wan sha kane ka tamasa man la ka miet naduh ba plie ïa kane ka tamasa kaba la sdang naduh ka 16 tarik u nohprah 2022 kiba la wan na kylleng ki jaka kiba napoh ka jylla Meghalaya bad kumjuh ruh kiba na bar jylla.
Haba phai sha ka mynnor ba la leit, utei u rangbah u la ïathuh ruh khyndiat shaphang ka shnong Moolamylliang bad ong ba kane ka shnong ka dei ka shnong kaba jaboh kaba la shah tap da ki jakhlia kiba la i saitmet, hynrei dei lyngba ka jingshim khia bad jingtrei shitom ka Dorbar Shnong ha ryngkat ka jingia shim bynta lang ki paidbah nongshongshnong ki la lah ban pynkylla dur ïa ka shnong ka thaw baroh kawei bad wanrah ïa ka khuid ka suba kaba la kring ruh ïa kiba bun ki paidbah riew ieid mariang ban peit ïa ka jingitynnad ka mariang kaba kup rong jyrngam “Lehse kane ka long ruh kum ka nuksa bad ka jingai mynsiem ïa kiwei kiwei ruh ba kin pynnneh pynsah ïa ka mariang bad ban wanrah ruh ïa ka khuid ka suba ha shnong ha thaw ban ieid ban burom ruh ïa ka mei mariang ka ban burom kylliang ïa ngi” ong u bah Apmon Pashiang.
U la ong ba ka Dorbar Shnong ka ai khublei kyrpang ruh ïa baroh kito ki riew rangbah, ki nongmih khmat bad ki heh sorkar kiba la kloi ban wan ban long kum ki kongsan bad symbud kongsan ha kane ka tamasa, kumjuh ruh ïa ki nongtem, ki nongrwai, ki pathai khubor bad baroh ki paidbah kiba la wan sha kane ka tamasa ba la pynlong da ka Dorbar Shnong.
