Hadien ka jingïapynbeit yn sangeh shwa ka jingïakhih haduh ba kut u Naiwieng
Mih shong kylliang myngor biang shisngi ki nongtrei ka JHADC
Jowai, Naiwieng 20: Ka jingbym ïoh tulop shuh jong ki nongtrei ka Jaiñtia Hills Autonomous District Council (JHADC) kaba la jan kynjop mynta sha ka 9 bnai kata naduh u Rymphang haduh Risaw 2023.
Kitei ki nongtrei hapoh ka lama jong ka Jaiñtia Hills Autonomous District Council Staff Association, (JHADCSA) Jowai mynta ka sngi nyngkong kila mih biang ban shong kyllaiñ myngngor ha phyllaw jong katei ka ophis ïa kaba la thmu ban pynlong lai sngi lynter ha ryngkat ki lama bad ki sopti rong ïong, kum ka dak ban pynpaw ïa ka jingsngewsih halor ka jingbym shahshkor jong ka sorkar ban pynïoh ïa ka tulop.
Kitei ki nongtrei hadien ka jingïakren pynbeit kila shim ïa ka rai katkum ka jingthoh bala ïoh pdiang na ka Executive Committee ka JHADC ba kin sangeh shwa ka jingïakhih shong kyllaiñ mynngor kaba buh ban pynlong naduh mynta ka sngi 20, 21 bad 22 tarik u Naiwieng.
Da kaba ong ruh ba ka Executive Committee jong ka JHADC kaba la pynbeit ban siew katba lah ïa katei ka tulop jong ki nongtrei ka Council hapoh jong une u bnai Naiwieng hi, hadien ba ka sorkar jylla kala pyllait noh ïa ka bhah pisa jong ka Council.
U ma Johnson Pohrmen President ka seng haka jingkren lyngba ka phone ula ong kane ka jingmih shong kyllaiñ biang jong ki mynta ka sngi ka long kum ka dak ban pyni sha ki bor ba halor ba kin shim khia ïaka kam kaba la buh jingeh ïa ki nongtrei ka Council na ka bynta ka jingdonkam jong ki naduh ka bam ka dih, ka koit ka khiah bad khamtam ba ka por jong ka aoim lehkmat kala jan.