Shillong, Naiwieng 20 : Ka Myntri ka Koit ka Khiah ka jylla, Kong Ampareen Lyngdoh ha ka sngi Nyngkong ka la khot ïa ki nongtrei ASHA (Accredited Social Health Activist ) kiba don ha ka lama jong ka Meghalaya Asha Worker’s Union sha ka miej ïa kren kaba long ha ka 22tarik mynta u bnai.
“…na ka liang ka Myntri ka Koit ka Khiah ka la khot ïa ka jingïalang bad ki nongïalam jongka Union sha ka miej jingïakren ha ka 22tarik u Naiwieng ha ophis treikam jong ka haba ïadei bad ka jingsangeh treikam jong ki,” ong ka shithi ba la phah da ka tnad sha ka Union ha kane ka sngi Nyngkong.
Kane ka la wan hadien ba ki nongtrei ASHA ki la rai ban pynjur ïa ka jingïakhih jong ki shajan Secretariat ha ka 27tarik mynta u bnai ban pyrshah ïa ka jingkuman jong ka sorkar ban kyntiew noh ïa ka jingsiew jong ki na ka 2000 tyngka sha ka 5000 tyngka shibnai.
Dang ha kane ka sngi Thohdieng ki ASHA ki la mih paidbah ban pynsngew sha ka sorkar ïa kitei ki mat jingdawa jong ki.
“Ngi la rai ban pynjur noh ïa ki jingïakhih bad pynlong da ka jingshong kyllaiñ myngor ba khlem buhpor hakhmat ka Secretariat,” ong ka President ka Union, ka Kong Maryjune Myrsing.
Katei ka nongïalam jong ka kynhun ka la ong ruh ba kum ka kynhun kin ym ran dien satia lada ka sorkar jylla kam lah ban kular ban pynurlong ïa kitei ki mat jingdawa jong ki ASHA.
Lah ban kdew hangne ba ka jingshakri ha ka koit ka khiah ka la shah ktah jur ha ki 7000 tylli ki shnong na ka daw ka jingïakhih ba khlem buh por jong ki ASHA ha kien ki artaiew.
