Shillong, Naiwieng, 20: Ki samla pule jong ka skulbah NEHU kiba don hapoh ka shatri jong ka North Eastern Hill University Students Union (NEHUSU) bad ka Khasi Students Union (KSU) NEHU Unit ha ka Lah Sngi u Blei ki la ai por ïa ki bor pynïaid jong ka skulbah NEHU ban wengkam mardor ïa u Sports Director ka NEHU u Nantu Das uba long u nongpeit ïa ka Security halor ka jingkynnoh ba u donkti ban thombor ïa kawei ka kynthei kaba dei ka Referee ha ka sngi u Blei.
Ka NEHUSU bad ka KSU NEHU Unit ki la aiti la ki jong ki jingujor ha u Vice Chancellor jong ka skulbah NEHU u Prof. PS Shukla da kaba dawa ba u dei ban un tuklar mardor halor kane ka jingjia kaba la pynher syrngiew ïa ki samla pule kynthei hapoh kane ka skulbah.
La sakhi ruh ba ki dkhot ki samla pule jong ka skulbah NEHU ki la rung da ka bor hapoh ka Conference Hall ha ki kynta ba u Vice Chancellor u dang shong jingïalang. U Vice Chancellor u la hap ban pyndem hakhmat ka jingdawa jong ki samla pule da kaba soi ïa ka jingujor kaba ki la aiti ha u.
Ha kaba ïadei bad kane ka jingdawa jong ki samla pule u Prof. Shukla u la pan por hapoh lai sngi ban leh eiei pyrshah ïa u Nantu Das uba la shah kem bad uba dang don ha ka kti jong ki Pulit halor kane ka jingshah kynnoh.
Ka NEHUSU bad ka KSU NEHU Unit ki la dawa ïa u Vice Chancellor ba u dei ban weng lut ïa ki kam ba la bat da u Nantu Das katba ka jingtohkit jong ki Pulit ka dang ïaid shakhmat hadien ba ki bahaing hasem jong ka lanot ki la mudui da ka ejahar pyrshah ïa u Nantu Das sha ki Pulit.
U Prof. Shukla ha ka jingïakren bad ki samla pule u la kular ba un sa shimkhia ïa kane ka jingjia ba ong ruh ba ka dei ka jingpynpohdor ïa ka skulbah bad na ka liang jong u ruh un ym ailad ba kum kine ki kam sniew kin wan jia hapoh ki saw kynroh jong kane ka skulbah.
U la ong ruh tang shu ïoh jingtip halor kane hynnin ka sngi u Blei u la khot ïakren ïa u Registrar bad ïa ki Ophisar jong ka skulbah na ka bynta ïakren sani halor kane ka jingjia.
“Kumba phi la ai por ïa nga lai sngi, ngan sa leh ïa kata,” la kular u Vice Chancellor hakhmat ki samla pule kiba pynrem jur pyrshah ïa u Nantu Das.
Ka samla Daïaphira Kharsati, ka Research Scholar hapoh kane ka skulbah ha ka jingïakren bad ki lad pathai khubor ka la ong, “kane ka jingle jong u Nantu Das ma ngi ki Research Scholar kiba trei ha ki Lab haduh 10-11 baje mynmiet ka pynlong ïa ngi ban ym don jingshngain lada don kum une u jait briew bad ngi dawa ban weng noh ïa u na ka kam kum u Sports Director jong ka Sports Department bad kumjuh ruh uba dei u incharge Security ha Nehu.’
“Haba u nongpeit jong ka Security ka NEHU u long kumne, ngim sngew shngain kum ki kynthei kiba pule ha kane ka skulbah. Ngi ruh ngi kyrshan ïa ka jingdawa jong ka NEHUSU kaba aipor ïa ka NEHU ban weng kam ïa u,” ka la ong
U President jong ka KSU NEHU Unit u Samla Sandy Sohtun u la ïathuh ba ka Seng ka la ïoh jingtip ba u Nantu Das u leit shaw da kali ïa ka Referee na Umshyrpi hadien ba la wan phai na shnong bad jrongkti ïa ka hapoh kali bad ynda la poi ha Kiang Nangbah Old Guesthouse u la pyrshang ban jrong kti ïa ka bad ha ka jingïaksaid ka la lait phet na ki tyrsim jong une u runar.
“Ngim da tip bha kumno ka jia bad ha kano ka rukom ka jia. Ngi la syllok bad i,” u la ong.
“Ka dei ka Refree kaba u Nantu Das u kular ban ïalam ïa ka sha Orissa namarba ka don ka Inter University. Ka Tournament kan sdang la shem taiew hynrei u Nantu Das u la phah wan ïa ka hynnin ka sngi U Blei nalor ba ka dei ka sngi shuti,” u la ong bad bynrap, “hynrei sngewsynei ba ha kum kata ka por u la shim kabu ban jrong kti pynban.”
Nalor kata, une u nongïalam ka KSU NEHU Unit u la ïathuh ba ka seng ka la ïoh jingtip ba u Nantu Das u la kyrpad ïa kane lanot ban ïasuk bad ban ïamap noh bad u khnang ba un lait ïalade na kane ka jingkhlemraiñ.
