Jin lada ka RDA ka treikam kumba la thmu, ka VPP kan nym mih satia: Ardent

Shiillong, Naiwieng 20: U Bah Ardent Miller Basaïawmoit, President ka Voice of the People Party (VPP) ba jin lada ka Regional Democratic Alliance (RDA) ka treikam kumba la thmu, ka VPP kan nym jin da la mih satia. Hynrei namar kane ka kynhun ïatreilang ka UDP bad HSPDP kim shym la trei kumba la thmu,kumta ka Seng VPP ka la mih pyrthei.
U Bah Ardent u la ong ïa kane haba kren ha ka jingïalang jong ka Seng VPP kaba la long ha Dongkiingding, kaba hap ha Mairang Constituency mynta ka sngi.
“Nga la ïadon bynta lang ha kaba thaw ïa ka RDA ha shuwa ka elekshon MLA ha u snem 2018. Hynrei hadien ka elekshon, ka jingthmu jong ka RDA ka la kylla khongpong, ba dei namar kane ka daw ka Seng VPP ka mih ban ai da ka jingshakri kaba thymmai ïa u paidbah”, la ong u MLA jong ka Nongkrem.
Ha kane ka jingïalang la ïadon lang ruh ki nongïalam ka VPP kiba kynthup ïa u Bah Grosspar Ryntathiang, Treasurer jong ka Seng, nangta u Sordar ka Sodadek, u Sordar ka Dongkiingding, u Bah John Basaiawmoit, uwei na ki nongïalam ka VPP na Mairang bad kiwei kiwei.
Shuh shuh haba kren ha kane ka jingïalang, u Bah Ardent u la ong ba naduh ba ladep ka elekshon MLA ka la don ka jingjia kaba phylla, kaba ym ju jia mynno mynno ruh bad kata ka long ka jingangnud ki paidbah ban leit sha ki jingïalang ka VPP bad ka jingshongshit Prah ki paidbah.”Kat shaba ngi leit, ki paidbah ha ka miet ka ïong ka slap ka lyer ki thrang beit ban leit sha ki jingïalang ka VPP bad ki kwah beit ban ïakynduh bad ïakhublei bad ngi ki nongïalam”, la ong u Bah Ardent. Nalorkata ka jingshongshit ka jingrwai Prah ruh ka long ka bym sngewlah ban mut dur, ha kaba wat ki khunlung ki bym pat lait kren bha ruh ki pyrta beit ha u Prah. Nangta ka jingrwai ruh kaba naduh ha ki skul, ki college, ki jaka khawai bad wat ha Puja ruh tem jingrwai Prah. “Kaei kane, hato kam dei ka bor kaba phylla na sha lyndet, namar ba ka VPP ka la shaniah ha ka jingpynïaid ka jong U Blei”, la ong u Bah Ardent.
Nakata ka daw, u khot u wer ïa ki paidbah ban ïasnoh kti lang ban kyrshan ïa ka VPP ban ïasaiñ dur thymmai na ka bynta ka synshar ka khadar ha ka jylla, ka ban long ka jingsynshar kaba khuid ba suba, ka bym leh shiliang, ka jingsyshar kaba wanrah ka jingmyntoi lang ïa baroh.
U Bah Ardent u la pynkynmaw ruh ïa ki jingjia ha kine ki bnai kiba ladep, ha ka por ba ka VPP kala pynlong ka jingïakhih halor ka Reservation Policy, da kaba u la shah thngan haduh palat 221 kynta hajan Addl Secretariat. Ha kane ka jingïakhih, la mih artylli ki jingjia kiba phylla. Kawei na kita kadei ka jingïatylli ka jaidbynriew, ha kaba ki paidbah ki la wan lut na kylleng ki jaka jong ka Ri Khasi Jaiñtia ban wan ai jingkyrshan ïa ka jingïakhih ka VPP bad ki phew hajar hajar ngut ki paidbah ki la klet noh ïa ka jingïasngew pher dong pher thaiñ, hynrei ban ïeng tylli lang kawei na ka bynta ka daw bah jong ka jaidbynriew.
Kawei pat ka jingjia kadei ka jingphai jong ka jaidbynriew sha U Blei, namar la ju tip ïa ka ri Khasi Jaiñtia kum ka jaidbynriew tip briew tip Blei, hynrei ki don ki por kiba kum ka jaidbynriew, ka la klet noh ïa U Blei, ha kaba kiba bun ki jingsniew ki la kha roi. “Hynrei ha ka jingïakhih ka VPP, ka jaka ïakhih ka la kylla long ka jaka duwai, ha kaba ki paidbah kiba la wan na ki kynhun Balang bapher bapher ki la pynlong ka jingduwai haba ki por ha ka jaka shah thngan. Nangta ka jaka ïakhih ka la kylla long ka jaka ïarwai ïaroh ïa U Blei”, la ong u nongïalam ka VPP, bad dei kane ka jingïatylli ka jaidbynriew bad ka jingphai sha U Blei, kaba ka sorkar ka la hap ba sngap bad ai ïa ki jingdawa jong ka Seng halor ka Reservation Policy da kaba thung ïa ka Expert Committee.
Hadien ka jingïalang ha Dongkiingding, la pynlong sa ïa ka jingïalang ha Mawphanñiew ha ka por janmiet, kawei pat ka Shnong kaba hap ha Mairang Constituency. Ha kane ka jingïalahn wat lada ka dei ha ka por mynmiet, ki paidbah ki la ïatuid ban sngap ïa ki jingpynshai na u Bah Ardent, nangta u Bah Brighstarwell Marbañiang, MLA ka Mawlai bad kiwei kiwei de ki nongïalam.