Yn ïaid beit ka Monolith Festival, la kumno kumno ha ki pdeng bnai jong u Nohprah mynta u snem

Shillong, Naiwieng 20 : U Chief Executive Member ka KHADC, Bah Pynïaid Sing Syiem ha ka sngi Nyngkong u la hiar sha Mawphlang, ka jaka ba ka Council ka pynkhreh na ka bynta ban pynlong ïaka Monolith Festival ha u bnai ban wan.
Haba kren bad ki lad pathai khubor hadien ba la dep ban jurip, u CEM u la ïathuh ba ka Council ha kaba sdang ka la buh ba pynlong ïa katei ka tamasa ha ka 14, 15 bad 16tarik u Nohprah hynrei la katta ruh kin hap ban bishar bniah biang hadien ba ki la ïohi ha katei ka sngi ïa ka rukom pynkhreh.
Tangba u ong pat ba ïa ka tarik kaba tikna kin rah shwa ha ka Special Committee khnang ban ïakren bad kin sa pynbna paidbah.
“Ngi la shim ïa ka rai ban pynïaid shakhmat ïa ka Monolith Festival bad ngi sngewthuh ba kane ka festival kaban pynlong hangne kan wanrah ïa ka jingithuh kyrpang khamtam na ka bynta kito kiba wan na shabar jong ka jylla Meghalaya bad ruh na kiwei ki bynta jongka pyrthei ba kin tip kham bniah shuh shuh shaphang ka riti dustur bad ka kolshor jongngi ka Jaidbynriew jongngi,” u la ong. Shuh shuh u ong ruh ba ka jingthmu ba kongsan jong katei ka tamasa ka long ba pyni sha ka pyrthei ïa ka jingriewspah jong ka Jaidbynriew ïa ka riti ka dustur, ka kolshor, ka rukom im, ka bam tynrai, ka shad tynrai, ki bad shibun kiei kiei kiba don ha ki 54 tylli ki Hima, Elaka ha u pud u sam jong ka Council.
Na ka liang u CEM u la pyntip ba ka sorkar jylla lyngba ka tnad Tourism ki la lah ban pynbha bad pynphuh shuh shuh khamtam ban maramot ïa ki iing trep jong ki Hima bapher bapher, ki jingker, ki lynti ïaid bad shibun kiei kiei.
U la pyntip ruh ba ki sngewkmen ba ka jingpyntrei ïa ka Khasi Heritage Museum ka la dep lut na ka bynta ban buh ïa ki tiar tynrai ban pyni.
“Hangne ngin sa buh lut ïa ki jingtip kiba bniah khamtam haba ïadei bad ki riewshlur, ki shipai jong ka ri Khasi bad ki Hima bapher bapher ha ka por ba ki ïakhun ïa ka thma ha ka por hyndai mynshwa. Nangta ngin buh ruh ïa ki jingdon jingem (tiar hyndai) ba dang don haduh mynta nalor ki kot ba batai ïa ki riti dustur bad kiwei kiwei,” u la ong.
La donlang ha katei ka sngi naduh u Chairman ka KHADC Bah Lamphrng Blah, Executive Member ka tnad Bah Victor Ranee, Lyngdoh bad Myntri ka Hima Mawphlang nalor ki ophisar na ka tnad Tourism bad kiwei kiwei.
Ha kane ka jingleit jurip, la sakhi ruh ba ka jingmaramot ïa ki iingtrep jong ki Hima, ki lynti ïaid ki dang ïaid shaid shaid bad na ka liang ka Council ka sngewskhem ba ïa kine baroh kynthup ïa ka surok yn lah ban pyndep shwa ka por ba la buh.