Shillong, Naiwieng 20 : Ka United Democratic Party (UDP) kan ïa syllok lang shwa bad ki nongïalam ka party baroh ha shwa ba kan rai bad jied ïa u kyrtong ban mih aireng na ka party ha kane ka elekshon MP kaban sa long shen ha u snem ban wan.
Ïa kane ka rai la shim ha ka jingïalang jong ka State Election Committee kaba la lamkhmat da u President, Bah Metbah Lyngdoh.
“Ngi dang ïaid mynta ha ka kam bad kumta ngi la rai ba kan don shwa ka jingïasyllok lang bad baroh ha shwa ban shim ïa ka rai. Ka jingthmu hi ka long ban ïoh ïa u kyrtong uba ïa mon lang,” ong u Vice President ka Party, Bah Allantry F Dkhar hadien ka jingïalang.
Shuh shuh la ong ruh ba ïa ka jingïasyllok halor katei ka bynta kan ïaid shwa lyngba ki district president bad ki secretary bad ki nongmihkhmat paidbah nalor ki nongtrei ka party.
“La ai por shi taiew ïa ki district president ban pyndep ïa katei ka kam bad ban pyntip pat sha ka State Election Committee,” ong u Bah Allantry bad bynrap ba hadien ba ki la ïoh ïa ki jingpynsngew na baroh, ka SEC kan sa shim ïa ka rai kaba khatduh da kaba syllok lang hapoh ka lama jong ka Regional Democratic Alliance (RDA) kaba donlang bad ka HSPDP.
Na ka liang ka party ka la pyntikna ruh ba mynta ka kynti kan sei kyrtong lang wat na rilum Garo ruh.
Kumban shu kdew hangne ki don katto katne ngut ki kyrtong kiba la paw kyrteng ban ïakhun ïa katei ka elekshon MP na ka tiket UDP na Shillong Seat bad kine ki kynthup ïa u President barim ka HYC, u Bah Rorbert June Kharjahrin, katba kiwei kiba thmu ki kynthup ïa u President ka Khasi Authors Society Dr. DRL Nonglait bad uwei pat dei u MLA barim ka Mawlai, Bah PT Sawkmie.
