4,135 bilor ka dawai Phensedyl kurup ki Pulit EJH na ka trok kit Umphniang, kem uwei
Khliehriat, Naiwieng, 20 : Ki Pulit jong ka East Jaiñtia Hills District ha ka 20 tarik u Naiwieng, 2023 ki la ïoh kurup 4,135 bilor ka dawai Phensydel kiba don ïa ka dawai kaba 100 ml ha manla uwei pa uwei u bilor ba la kit be-aiñ da kawei ka trok kit umphniang Diesel kaba don ïa u nombar NL-01-AH-2246.
Ki Pulit ki la kem ïa u Shakeep Sheik uba dei na ka jylla Maharashtra bad register case hapoh ka Khliehriat Police Station hapoh ka Section 279/337/338/427 Indian Penal Code pule lang bad ka Sec 22(c)/29 jong ka NDPS Act khnang ban buddien shuh shuh halor ka jingïoh kurup ïa kine ki dawai.
U Superintendent of Police jong ka East Jaintia Hills District, u Jagpal Singh Dhanoa ha u kyrwoh ba la phah sha ki lad pathai khubor u la ïathuh ba ha ka sngi Thohdieng jong ka taiew baladep, ki Pulit ki la ïoh jingtip ha ka por kumba 6.30 baje mynstep ba ka don kawei ka trok kit umphniang kaba la thung khongpong ha kawei ka riat kaba jylliew ha ka shnong Umtyra bad ïa u nongñiah jong ka trok uba la sahkut hapoh ka Cabin jong kane ka trok ïa uba la tip kyrteng kum u Shakeep Sheik la ïoh sei bad la pynkit mar mar sha ka jaka ai jingsumar ha Civil Hospital, Khliehriat.
Ha ka jingtohkit, une u nongñiah jong ka trok u la kam ba ka trok ka dei kaba kit ïa ka umphniang Diesel bad ïa ki kot ki sla jong ka kali la lap na ka Cabin ba shong u nongñiah trok. Hadien ba la tohkit ïa ki kot ki sla, ka kyrteng jong u trai kali bad ka jaka sah ki ïapher katkum kaba paw ha ka e-challan App.
U SP u la ïathuh ba ki Pulit ki la tohkit na ka Bharat Petroleum Transport Office, ha kaba la lap ba kane ka kali kam shym la kit satia ïa ka umphniang (diesel) na ka karkhana bad kam don satia kano kano ka jingbuh jingthoh kaba don hapoh ka ophis jong ki bad kane ka la pynsuba sniew ïa ki Pulit.
Shuh shuh u SP, u la ïathuh ba ka 20 tarik mynta u bnai, ki Pulit ki la talasi ïa ka trok bad ïa ki bynta ba shapoh jong ka top umphniang ha kaba ki la lap ïa kaei re kaei kaba la buhrieh hapoh ka Chamber jong ka top umphniang. Marmar la khot ïa ki nongsakhi sha ka jaka ba don ka trok bad da ka jingïarap jong ki nongot la lah ban weng ïa ki nar jong ka top umphniang na ka Chamber ha kaba la lap pynban ba la thep ïa ki dawai bilor Phensedyl.
“Haduh 4,135 tylli ki bilor dawai Phensedyl la ïoh ban kurup kiba dap da ka dawai 100 ml,” ong u SP bad bynrap, “hadien ba la pyndep ïa ki jingtohkit katkum ka NDPS Act la kurup noh ïa ka dawai.”