Shillong, Naiwieng 19 : Ka Meghalaya Football Association kaba dei ka synjuk kaba peit ïa ka jingïalehkai phutbol ha ka jylla baroh, ha ka sngi Nyngkong ka la pynrem jur halor ka jingjïa kynnoh jrongkti jong u Assistant Sports Director ka skulbah NEHU, u Nantu Das ia kawei ka rephri.
“Na ka liang ka MFA ngi pynpaw ka jingsngewsih kaba khraw halor katei ka jingjia hynin ka sngi ha kaba utei u Nantu Das u pyrshang ban jrongkti ïa ka rephri jong ka SSA. Ngim lah satia ban pdiang ïa kum kine ki jingjia bad kumta kum ka kynhun ba peit ïa ka bha ka miat jong ka phutbol ngi pynrem jur ïa ka jingleh jong utei u Assistant Sports Director ka NEHU,” ong u President ka MFA, Bah Hamletson Dohling ba dei ruh u Chief Adviser jong u Myntri Rangbah ka jylla.
Na ka liang ka Synjuk, ka dawa ruh na u Vice Chancellor ka NEHU ba kadei ban weng kam mardor ïa utei u briew namar katei ka jingjia ka la wanrah ka jinglehraiñ bad ka jingkhlemraiñ ïa ka skulbah baroh kawei.
“Kane ka jingleh jong u ka la pynlehraiñ ïa ka University baroh kawei bad ka long ruh kumba pyrshang ñiewbeiñ ïa ka kyrdan ki rephri kiba ka MFA ka ñiewkor bha ïa ki namar dei ma ki kiba pynïaid beit ïa ka phutbol ha kylleng ki lympung ïalehkai kiba don ha ka jylla,” bynrap biang u President ka Synjuk.
Shuh shuh u ong ruh ba kum ka Synjuk ka sngew ba kum ïa kitei ki jingjia ym dei satia ban ailad ba kan jia khamtam ïa ki trai muluk trai jaka.
