Nongstoiñ, Naiwieng 20 : Ka long kaba sngew myllung ïa ka longïing jong uwei u khynnah, u ba don jingthut ha ki dkhot met bad u ba matlah baroh ar tylli ki khmat naduh dang kha, u bym lah ban ïeng haduh mynta ba u la dap 28 snem ka karta u ba la tip kyrteng kum u Jangson Jongske Sangma na ka shnong Nunmati kaba don harud ka surok Langja-Athiabari, u ba ka kmie bad u kpa jong u ki la khlad noh naduh ba u dang lai snem ka karta.
Ha ka sngi palei jong ka taïew ba la dep u Doktor Richard Wahlang u ba dei peit ïa ki ba thut dkhot met ha West Khasi Hills, ryngkat u bah K.P.Pangniang ba la ïalam da u hynmen jong u, ki la leit sha ka ïing jong u paieit jong u, u bah Darbit Marak ban ïakynduh ïa utei u khynnah.
La lap ba utei u khynnah u lait ban kren hynrei ka sur kam da shai bha bad ki khmat pat ki matlah baroh ar tylli bad um ïohi satia wat tang byrngut byrnget ruh. Nalor kata ka lok jong utei u paieit u ba sumar ïa utei u khun ksiew ruh ka la khlad noh la slem bad mynta ki don tang utei u paieit u Jangson bad u hynmen jong u.
Haba kylli na utei u paieit la u la pyrshang ne em ban ïalam ïa u Jangson sha ki Doctor ne sha ki hospital u la ong ba ka longkaba shitom haduh katta katta ban ïalam ïa u Jangson namar um long satia ban shong kali. U la ong ruh ba tang shu kiew ha ki kali u la ïapler. Nalor kata u la ong ba um pat ïoh kino kino ki jingïarap na ka sorkar. Um pat don Adhaar card na ka bynta ban aplai ïa ki lad jingïarap na ka sorkar.
Na ka liang u Bah Pangniang u la ong kiba kum kitei ki nongshong shnong kiba ïakynduh ïa kiba kum kitei ki jingeh, ki nongsynshar shnong ki la dei ban ai ki jingkheiñ kiba biang ïa kino kino ki longïing kiba don ïa ki khun ki kti kiba don jingduna ha ki dkhot met. Dei ban pyntip sha ki bor sorkar kiba peit ïa ka kot ka khiah, khnang ba kin shimkhia bad thaw ki lad ki lynti kumno ban ïarap ïa kiba kum kitei ki longïing.
