Shaduh ka International Level yn plie lad ïa ki riewdonsap lyngba ka ‘Sur Kynud Tynrai’

Shillong, Naiwieng, 20: Kum shi bynta ban kyntiew ïa ki samla donsap jong ka jylla ha ka rwai ka siaw shaduh ka international Level sa shi sien biang ka Don Bosco Media Network (DBMN) kan pynlong ïa ka jingïakop rwai kaba la tip kum Sur Kynud (The Voice)
Ha ka jingïakren bad ki lad pathai khubor ha ka Lah Sngi u Blei u Bah OL Marbaniang uba long u dkhot jong ka shlem treikam ka Don Bosco Media Network u la pyntip ba jingmut jong kane ka Reality Show ka long ban kyntiew ïa ka sap ka phong jong ki kaitor ban rah ïa ki shaduh ka International Level bad ïa kito kiba kwah ban nang ban rwai lyngba ka jinghikai jong ki Coaches bad ruh kiba dei ki Judge jong kane ka rynsan ïakop rwai.
U la ïathuh ba ka rukom pynïaid ïa kane ka rynsan ïakob rwai ka long kum ka rynsan ïakob ‘The Voice’ ba la pynïaid shabar jong ka ri India.
Ka Blind audition kan sa long ha ka 2 tarik, Noprah 2023. Ki nongrwai kin hap ban pynkhreh kawei ka jingrwai kaba ki jied katba ki kwah ban rwai. Lada ki Coaches/Judges ki jied ïa u/ka nongrwai ban ïaid sha ka kylla kaba bud ne ka Elimination Round-1. Ïa u/ka nongrwai kin hap jied ïa u/kawei na ki Coach/Judge ban hikai ïa u/ka ban rwai. U/ka nongrwai kim donkam shuh ban siew ïa ka bai shah hikai ha u/ka Coach/Judge. Ban shah hikai, u/ka nongrwai bad u/ka coach kin hap ban ïa pynbeit ïa ka por bad katno sien shitaiew kin ïoh ïa ka jingshah hikai ka ban sa long ha Don Bosco Youth Centre, Laitumkhrah, Shillong.
Kin sa don ki Elimination Round naduh 9 tarik Noprah 2023 terter haduh ban da poi sha ka Grand Finale ka ban long ha ka 31tarik, Kyllalyngkot, 2024 ha Don Bosco Youth Centre, Laiumkhrah, Shillong. Kito kiba la shah jied na ka Blind Audition, kin sa ïoh jinghikai na bynta ka Elimination Round kaba bud bad kito ki bym shah weng ha ka Elimination Round-1, ki sa ïoh jinghikai ban ïakhun sa sha ka Elimination Round-2 bad ter ter haduh 10 ngut yn jied ban ïakob ha ka Grand Finale.
Ha ka Grand Finale ki Coaches/Judges kin ym ai Marks shuh hynrei kin don ki External Judge ne ki nongbishar ba shabar ki ban bishar ïa ka jingïakob. Naduh ka Elimination Round-1, ki Views ha YouTube ruh ki ai Marks nalor ki Marks ba la ai da ki Coaches/Judges.
Ka bai registration kan long shi hajar tyngka bad ki nongïashim bynta kin dei tang ki nongshong shnong jong ka Jylla Meghalaya.
Ka khusnam na ka bynta ka jingïakob ka long T.1 lak bad u/ka lahduh kin long ki Brand Ambassador jong ka Don Bosco Media Network ban ïoh ïashim bynta ha ka International Level kum ka Vocal Star ne ‘The Voice’ ki ban sa long shabar jong ka ri India. Kin ïoh ruh ban rekod bad Videograph ar tylli ki jingrwai ba la shna hi ha kaba ka Don Bosco Media kan siew ïa baroh ki jinglut jingsep.
Ha u snem ba ladep ka heprit Chevinia Mawnai ka la long ka nongjop ha ka rynsan ïakob rwai bad ka la jop ruh ïa ka Vocal Star kaba la long ha United Kingdom.