Nongpoh, Naiwieng 20: U Myntri sorkar ka jylla, u Ma Kyrmen Shylla mynta ka sngi u la leit ban shim bynta ha ka prorkam ba la pynlong ha USTM ban plie paidbah ïa ka 1st Bath ka tnad Pule jong ka Bachelor of Ayurvedic Medicine and Surgey ha ka skulbah jong ka IA Ayurvedic Medical College, USTM, Khanapra ha Ri Bhoi District.
Kane ka jingleit plie une u myntri sorkar ka jylla ïa katei ka tnad Pule ki samla, ka dei hadien ba ka USTM lyngba ka IA Ayurvedic Medical College mynta u snem ka la sdang ban pdaing ïa ki samla pule kiba wan ban pyntbit ïa lade ha katei ka tnad pule.
Haba plie ïa kane ka tnad pule ki samla pule, nalor utei u myntri ka sorkar jylla, la sakhi lang ruh da ka jingdon lang u Chancellor ka USTM, u Mahbubul Hoque, Vice Chancellor, Prof GD Sharma, Prof. (Dr.) Pranabjyoti Baishya, Principal, Govt. Ayurvedic College, Guwahati, Prof. (Dr.) Anil Kumar Sharma, Principal, IAMC, USTM bad u Prof. (Dr) RK Sharma.
Kum ban pynkynmaw, ka UStm ka la ïoh lad ban plie noh ïa katei ka AI Ayurvedic Medical College, ka dei hadien ba ka la ïoh bor na ka National Commission for Indian System of Medicine (NCISM), Ministry ka tnad Ayush.
Haba ai jingkren ha kane ka sngi, u Ma Kyrmen shylla kum u myntri sorkar ba dei peit ïa ka tnad Revenue & Disaster Management, u la ong ba u ai khublei kyrpang ïa ka ki bor pynïaid ka USTM khamtam ha ka jingïalam u Chancellor, u M. Hogue ba ki samla pule na ka jylla ki la ïoh lad ban pule sa ha kane ka tnad pule kaba long ka jingkyrkhu ïa ki samla pule ka jylla.
U la ong ruh ka jingdon ka skulbah USTM ka la kyntiew shisha ïa ka jingnang jingstad bad ka pule ka puthi hapoh ka jylla bad kyrmen skhem ruh ba kane ka skulbah kan dang lah ban pynmih shibun ki samla pule kiba don pat ka jingkitkhlieh na ka bynta ka jylla bad ka ri hi baroh kawei.
Shuh shuh, u la ong ruh kumba ka Meghalaya ka dei kata ka jylla kaba long ka pdeng jong ka pule ka puthi (Education Hub) bad ka jingdon kane ka skulbah ka la rah shisha ïa ka burom jong ka jylla Meghalaya ba kan dang kiew shaphrang ha kaba kyntiew ïa ka jingnang jingstad bad ka pule ka puthi ki khun samla ka jylla bad ka ri hi baroh kawei, u la bynrap.
