Thnum ki paidbah ba mynthi u MLA ïa ka jingjot rathai ka surok Ktiehthawïar-Langpih

Nongstoiñ, Naiwieng 03: Ka surok na Ktiehthawïar haduh Langpih ka dei ka surok kaba donkam haduh katta katta, namar ba ka ïew Langpih ka dei ka ïew khappud kaba ki paidbah jong ki shnong kiba hap ha ka ri Muliang, ki leit ban siew ban tda ban khaïi ban pateng.
Ïa katei ka surok kaba jngai tang kumba khyndai kilomitar ei ei la dep siang rong naduh ki snem 2010 shaneng. Hynrei namar ba ym don jingmaramot mynta katei ka surok, ka la pra bad jot rathai ha kaba ki kali ba kit ïa ki nongleit ïew leit hat ki la shem shitom bha ban ïaid bad ïabeh biang por.
Halor ka jingsniew jong katei ka surok, ki paidbah nongshong shnong ki la pynpaw ka jingsngewkhia, namar ha ki snem ba la dep hadien ba la dep siang rong, ka tnad PWD ka ju ai bylla ban phah prat pynkhuid ïa ki sañium baroh shilynter jong ka surok. Hynrei mynta lah da ki bun bun snem kam ju ai bylla shuh ban phah pynkhuid ïa ki sañium bad wat ki nala kiba pyntuid ïa ka um ruh ym don satia.
Ki katto katne ki nongshong shnong naduh ki thaiñ Langja, Ktiehthaw?ar, Umthlu bad kiwei kiwei ki shnong haba pyntip ha u nongthoh khubor, ki la ong ba tang namar ka jingsniew jong ka surok, ki nongñiah kali ki hap ban pynkiew ?a ka bai leit bai wan bad ka bai kit bai bah. Kane ka la pynlong ïa ki nongdie jingdie ruh ba kim banse ban pynkiew dor ?a ki mar ki mata, namar lada kim pynkiew dor ruh tang ka bai kali kam mih shuh.
Nalorkata, ki la ong ruh ba ki nongdie jingdie kiba wan na kiwei pat ki shnong kum na Nonglang, Kyndongei, Mawkapiah, Kyrdum bad naduh Nongstoiñ kim da sngewthuh than namar ki ?aid na Kyrdum bad ka surok ruh ka dang bha. Nangta na Mawsikar ruh shaduh Langpih la bteng sa ka surok rong ba la shna da ka sorkar Assam, kaba wat kane ka surok ruh mynta ka la sdang ban jot ban pra bun jaka.
Halor kine kiei kiei, ki paidbah nongleit nongwan ki la thnum ruh ?a u MLA ka Rambrai Jyrngam u R.G Momin, ba naduh ba u la jop haduh mynta, um pat leh ei ei bad um pat kren ei ei wat tang shikyntien na ka bynta ka jingmyntoi jong ki paidbah.
Ki la ong ruh ba ha ki don shibun ki briew kiba kren beiñ ?a ki ar ngut ki MLA barim kata u bah K.P.Pangñiang bad u bah Kimfa S. Marbañiang, da kaba kynnoh ba kim leh ei ei. Hynrei, une u MLA ba mynta lei lei wat tang ban ?akynduh ruh kim ju ?akynduh satia. Ki la ong ruh mynta lei lei bad MLA bad MDC na ka juh ka ?ing te imat ka dei halor kane ka nongrim ba kim kheiñ briew shuh ?a ki paidbah.
Lah ruh ban pynkynmaw ba halor kajuh kane ka surok kaba la pynsyrtok ïa ki paidbah, ka Synjuk ki Nongsynshar Shnong Nongmynsaw Syiemship dang ha u bnai Jylliew mynta u snem, ka la leit ban ïakynduh ryngkat ka jingthoh markhmat bad u Executive Engineer PWD (Road) Mawshynrut Division, ban pynsngew ïa ki jingeh ka dong ka thaiñ ha ka jingïadei bad ki surok khamtam eh ha ka thaiñ Langpih.
Ha ka jingïakynduh ka synjuk ka la pynpaw ïa ka jingdonkam ban maramot noh ïa ka surok Ktiehthawiar sha Langpih. Kumba long haduh mynta kane ka surok ka long kawei na ki surok ba kongsan haduh katta katta ïa ka thaiñ Langpih hi baroh kawei. Hynrei mynta ka la jot bad pra lut kaba ym lah shuh ban ïaid ki kali khamtam lada dei ki sngi ba jur slap.
Ki nongïakam ka Synjuk ki la pynpaw ruh ba kane ka surok la ïoh ban siang rong naduh u snem 2010 bad haduh mynta la 16 snem tam kam pat shym la ïoh jingmaramot wat tang shisien ruh. Kumta ka jingjot jingpra jong kane ka surok ka la long kaba la shyrkhei haduh katta katta, pynpaw ki nongïalam ka synjuk.
Ka synjuk ka la pynpaw ruh halor ka jingdonkam ban trei pyndep noh ïa ka surok thymmai na Langpih sha Mawdiangsnam. Kane ka surok ka long kaba la mang ban shna na Iew Langpih shaduh ka surok ban leit sha Mawdiangsnam, hynrei haduh mynta ym shym pat la pyndep sa kumba 300 mitar eiei na lad Mawdiangsnam ban siang rong.
U Bah Sandiwel Synchiang President ka synjuk u la ong, “Ki nongïalam ka synjuk ki la ïoh ruh ban pynshai bniah hakhmat u EE ba kane ka surok ka don hapdeng ka jingeh namar ka jingpyndik jong ka Assam ban trei. Ha kaba ïadei bad kane na ka liang ka Synjuk ngim sngew ïahap ba ka sorkar kan shu ai daw haba ngim shym la pat ïohi dak ei ei ba la sdang bteng ban trei ïa kane ka surok”.
“Kumba ka long baroh shikatta bun bah ki kam pynroi kiba ka Sorkar Assam ka trei ha ka thaiñ balei pat lada trei ka Meghalaya ki pyndik. Kum ki nongïalam shnong ka thaiñ ngi kyntu ba ka sorkar kan bteng beit ban trei ïa kane ka surok na Langpih lad Mawdiangsnam sha Mawdiangsnam. Ka sorkar ka dei ban sngap ïa ka jingdawa jong ki paidbah nongshong shnong ym ban sngap ïa ka Sorkar Assam”, u la ong.