Ha New Delhi, yn dawa ïa ka jylla Garo bad Khasi-Jaiñtia na ka Sorkar India

Tura, Risaw, 30: Ka Garoland State Movement Committee (GSMC) ba la ai jingkyrshan da ka National Federation for New States (NFNS) ka la rai ban pynlong da ka jingïakhih ba jaijai ha Jantar Mantar ha New Delhi ha ka Dorbar Tlang ban sa long jong ka Parliament ban pynim biang ïa ka jingdawa jylla Garoland.
U President jong ka NFNS u Prof. Munish Tamang uba la wan poi ha nongbah Tura ban ai jingkren ha ka jingïalang dawa jylla Garoland kaba la long ha ka sngi Saitjaiñ ha ka jingïakren bad ki lad pathai u la ong ba ka jingïalang ka la shim ïa ka rai ban pynlong da ka jingïakhih jaijai kaba ar sngi da ki nongïalam na rilum Khasi bad na rilum Garo ban pynkhlaiñ ïa ka jingdawa.
U la ong ba baroh ki shnat treikam jong ka NFNS kin sa phah ïa ki nongmihkhmat ban leit sha Delhi ban pynkynmaw ïa ka Sorkar India halor kane ka jingdawa ba shongnia.
Shwa kane, haba kren ha ka jingïalang, u Tamang, u la ong, “ngi donkam ban pyni ïa ka dak ha Delhi. Ngi donkam ban pynsngew ïa ka sur jong ngi namarba ka dei ka hok jingdawa katkum ka riti synshar. Ka jingdawa jong ngi kam dei kaba long be-aiñ.”
Haba kdew ïa ka jingkren jong u Myntri Rangbahduh ka ri u Narendra Modi halor ka jingangnud ban pynlong “kawei ka Ri, kawei ka India,” u Tamang u la ong, “u Myntri Rangbahduh u kwah ba baroh kin long tang hapoh kawei ka India. Haoid, ngi ngeit ha ka jingïatylli jong ka ri India. Ym don mano mano ruh ba lah ban buh jingkylli ïa ka jingïatylli jong ngi, ka jingaiti lut ïa la ka ri Indi bad ka jingpyrta ka dei ban long kawei ka Ri, hynrei bun tylli ki jylla.”
U la ong ba ka NFNS, ka kynhun kaba mihkhmat ïa ki thaiñ kiba dawa jylla bad ki jylla kiba rit, ka don ïa ka jingïadei kaba kyrpang bad ka Garoland bad u Nikman Ch. Marak uba long ruh u Dy. CEM jong ka u la shah jied kum u Vice President.
U Tamang u la ong ba ka jingïaid rali, kan long ka jingsah kynmaw pateng la pateng namarba ki jaidbynriew Garo mynta ki la ai jingkyrshan ïa ka jingdawa Bodoland, Gorkhaland, Vidarbha, Tipraland, Kuki State, Bundelkhand, Purbanchal bad kiwei kiwei kiba dawa la ka jong ka Jylla.
“Kane ka jingdawa, (Garoland) kam dei tang tang hapoh ka jylli jong ka jylla, hynrei ka ïoh ïa ka jingkyrshan na baroh bad namarkarkata kam long kaba eh lane ka jingïaid lynti kaba jlan ban pynurlong. Nga sngewsih ba kum kiwei pat ki jylla ha ka ri kiba la ïatakhuh ïa ka jingpyrshah na ki jylla kmie, hynrei ka Garoland kam shym la mad ïa kane ka jingpyrshah bad namarkata kam jngai shuh ka jingïaid lynti,” ong une u nongïalam jong ka NFNS.
Shuh shuh u la ong, ba ka jingdawa ka la jur bha bad kane kan pynïoh ïa ki paidbah ïa ka jingangnud ban ïoh ïa la ka jong ka jylla Garo.
“U Myntri Rangbahduh shisien u la ong ba un shimkhia ïa ka jingangnud jong ki paidbah. Hynrei ngin ym shong kli kti bad ai ba u Myntri Rangbahduh un pynurlong ïa ki jingdawa jong ngi. Ki paidbah ka rilum Garo ki dei ban pynurlong ïa ka jingangnud jong ki, ki dei ban long ki trai bad ki pynurlong ïa ka jingphohsniew bad ngin ïai don ryngkat ban kyrshan ïa phi,” ong u Tamang.
Ka Hill State People’s Democratic Party (HSPDP) ba la ïalam da u President u Bah K.P Pangniang kaba la ïashim bynta ha kane ka jingïalang ka la pynpaw ïa ka jingangnud ban long ka dkhot jong ka NFNS na ka bynta ban buddien ïa ka jingpynkha la ka jong ka Jylla Khasi-Jaiñtia.
U Tamang uba la pdiang sngewbha ïa ka jingpynsngew jong ka HDPDP lyngba ka rai ba lah ban ïadon bynta ha kane ka kynhun. “Ngi ïalong lang kawei ha kajuh ka jingïaid lynti bad ka jingdon lang jong phi kan kham pynduna ka jingïaid lynti kaba eh,” u la bynrap.
Shwa kane, da ki phew hajar ngut ki paidbah ka rilum Garo ki la ïashim bynta ha ka jingïaid rally ryngkat lang bad ki Nokma, ki MDC barim ka Garo Hills Autonomous District Council, ki dkhot jong ki kynhun sengbhalang, ki dkhot jong ki seng saiñpyrthei bad kumjuh ruh ka Hynñiewtrep Integrated Territorial Organisation (HITO).