Shillong, Risaw, 30: U General Secratary jong ka People’s Democratic Front (PDF) u samla Auspicious Lyngdoh, u la kyntait war ïa ki khubor hamsaïa kiba la mih ba un ïakhun ïa ka elekshon sha ka Ïingdorbar Thawaiñ ka Jylla Meghalaya na Mawphlang Constituency ha u snem 2023 na ka United Democratic Party (UDP).
U la ong kumba ka PDF ka ladep pynbna ba un long u kyrtong jong ka ha ka elekshon ban wan namarkata un ïakhun beit na ka tiket jong ka PDF kaba u la don naduh ka khyllipmat ba la suit la shor ïa ka.
U samla Auspicious u la ïathuh ba ha u bnai Ïaiong mynta u snem hadien ba la bna wur wer ba u Bah Eugeneson Lyngdoh Mawphlang yn ym ïakhun shuh ïa ka elekshon la don ki riewrangbah kiba la ai jingmut ban leit ïakren bad ka la don ka jingïakren hapdeng jong ki ar ngut ha kaba la ïakut ban ïakren biang.
U la ong ba ha u Naitung, 2022 la bna biang ba u Bah Eugeneson un ïakhun kumta na ka liang u Bah Auspicious ruh u la rai ban ïaid noh shakhmat.
“Hadien katto katne taiew ba u ladep shim rai ka la wan pat ka jingpynsngew na ka liang ki nongkitkam jong ka UDP Mawphlang Constituency kiba la ïakren biang ba u Bah Eugeneson un ym ïaleh shuh bad kumta ki la tyrwa ïa nga ba ngan ïakhun na ka UDP”, u la ong.
Da kaba kdew ba um lah shuh ban kylla na ka rai kaba u la shim, u la ong ba un ïeng ïakhun beit na ka tiket jong ka PDF namarba u ladep ïaid la jan baroh ki shnong bad ki nongkyrshan jong u ruh kim kwah ba un kylla.
U la ong ba ka jingtyrwa ka wan nyngkong na ki nongkitkam ka UDP Mawphlang Constituency bad ki la ong ruh ba ki da don ruh ïa ka jingïakren bad ki nongïalam ba hakhmat ka UDP Central Executive Committee.
U la ong ba shibun ki nongkitkam ka UDP ki la rai ba lada u Bah Eugeneson u shim rai ban ym ïakhun shuh elekshon hi kin phai khmat noh sha u.
