Ngi kyrmen ba ka NPP kan jop palat 30 seat ban ïalam ïa ka sorkar ha u 2023 : Sniawbhalang Dhar

Shillong, Risaw 28 : Uwei na Nongïalam ka Congress uba dei ruh u Myntri ka tnad pynroi sor bad MLA ka Nartiang Constituency u ma Sniawbhalang Dhar u la pynpaw ka jingkyrmen skhem ba ka NPP kan jop palat ïa ka 30 seat ha u 2023 ban ïalam hi ïaka jingsynshar ha ka jylla.
“ Ngi kyrmen skhem ban jop palat 30 seat ha kane ka kynti ban ïoh thaw ïaka sorkar ba thymmai ha u 2023 ha kane ka jylla Meghalaya jong ngi” ong u ma Sniawbha.
U la ong ba ka ka AITC kaba dang wan rung thymmai shaka jylla ruh kan jop bun eh 7 seat kata na ri lum Garo bad nangne na Khasi bad Jaiñtia Hills.
“ Kumba ka long mynta ka lyer jongka NPP ka beh naduh ri lum Garo haduh ha ri lum Khasi bad Jaintia Hills kumta ngi kyrmen ba la kumno kumno ruh ngin jop 15 seat na Garo Hills bad 16-17 seat nangne na Khasi bad Jaiñtia Hills” ong biang u ma Sniawbhalang.
U la ong lait ka AITC kiwei kiwei ki party ruh ki shem jingeh bha ban jop ha ri lum Garo ha kane ka kynti ba mynta.
U la ong ruh lada long kumba beh ka lyer mynta ka don ka jingkyrmen skhem ba ka NPP kan jop na baroh hynniew tylli ki constituency na Jaiñtia Hills.
U la ong shuh shuh ka AITC kam pat ïoh ka jingshaniah ha ki paidbah ka jylla Meghalaya. “ Na kata ka daw kat kum ka jingtip ba nga la ïoh lum lada ka jop bun eh ruh 7 seat ha baroh kawei ka jylla” ong u ma Sniawbha. U la ong ka daw ba kin ym jop bun ha ri lum Garo ka long ba ka vote kan ïapait hapdeng ka AITC bad ka Congress namar baroh kine kiba phet sha ka AITC ki dei kiba jop na ka Congress bad kumba ka Congress ka dei ka party ba la rim kin don beit ki nongbud ba shitrhem jongka ki ban ym phet da lei lei ruh na ka Congress. U la ong shuh shuh ba nangne na Khasi bad Jaintia Hills lada ki jop eh ruh kin jop 1 lane 2 seat namar kiba bun hi ki constituency ka jingïakhun kan long hapdeng ka NPP bad UDP beit.
U la ïathuh ruh ba ha kine ki khyndiat por ban wan kin don palat 10 ngut ki MLA ki ban wan pynïasoh sha ka NPP bad ïakhun ruh na ka NPP ha ka election 2023. Kine kin long na ki party bapher bapher.
Halor ka jingkylli hato kin don ne em u kyrtong Myntri Rangbah, u ma Sniawbha u la ong ïa kata ngin sa tip hadien ka election 2023 namar une uba mynta u Conrad K Sangma ruh u la biang bad trei bha ïa ka kam. Hynrei wat la katta ruh ka shong ha kiba bun ba lang hadien ba la dep ïoh ïaka result ban shim ïa ka rai bad jingmynjur lang.