Haduh 53,000 tylli ki jingïasyllok bad ki nongpang pyndep ka Teleconsultation ha ka jylla

0

Shillong, Risaw 30 : Ka jingïasyllok lyngba ka phone haba ïadei bad ka koit ka khiah kadei shi bynta ban ai ka jingïarap ïa ki nongpang kiba sah ha ki bynta ba kyndong tam jong ka jylla ban ïoh ïa ka jingshakri ha ka koit ka khiah, Ïa kane ka sienjam la mait phang da u Myntri Rangbah ka jylla, Conrad K Sangma da ka thong ban pyntikna ba kan don ka jingïa syllok online ha ka por ba ka jylla ka don ha ka thma COVID.
Ïa ka sien pyrshang kaba dang shu dep la pyllait paidbah ha Meghalaya ha u Ïaiong 2020 hapdeng ka thma COVID ban pynïasoh ïa ki nongpang bad ki lad ai jingsumar khnang ba kin ïoh ïa ka lad ban syllok haba ïadei bad ka pang ka shitom ba ki don kaba mynshwa kadei beit tang ha ki district headquarter bad ruh ha ka nongbah jong ka jylla.
Ka sorkar Meghalaya lyngba kane ka sienjam ka buh thong ruh ban ai ka jingshakri kaba paka tam sha baroh ki nongshong shnong. Naduh ba pyntreikam paidbah ïa ka, ki la don haduh kumba 53,000 ngut ki jingïasyllok bad ki jingïarap ïa ki nongpang lyngba ki 467 tylli ki lad kiba don ha ka jylla.
Namar ha ka por ba pyllait paidbah ïa ka, kadei ha ka por ba jur bha ka khlam COVID, kumta ka la ïarap haduh katta katta ban khanglad ïa ka jingïoh saphriang stet jong utei u virus bad kiwei kiwei ki jingshitom nalor ba ka pynsuk ruh ïa ka jingkit bakhia ha ki jaka ai jingsumar kiba dang hap ban ïakhun ban ai ka jingsumar shaduh ki nongshong shnong ba don ha kyndong tam.
Lyngba ka sienjam jongka National Health Mission (NHM) Meghalaya ban syllok bad ki paidbah lyngba ki kor ki bor ba tip kum ka e-Sanjeevani ka ai ruh ka jingshakri kumno ba ki Specialist kiba don ha ki hospital ki lah ban batai ne syllok bad ki nongpang kiba don ha ki Health and Wellness Centres (HWCs) lane ki Sub centres/PHC/UPHC ba kyndong tam ha ka jylla.
Ka kyrwoh na ka tnad ka Koit ka Khiah ka ong ruh ba ka Teleconsultation ka la pynshisha ruh ba ka long ka jingkyrkhu khamtam ïa ki paidbah ba sah ha ki jaka ba kham kyndong jong ka jylla. Namar ka jingbteng ka jingdawa na kiba bun ki HWC, Sub Centre na kylleng ki jaka ban buh noh khambun ki doctor ka la pynlong ïa ka NHM Meghalaya ban mang shuh sa 18 ngut ki Medical Officer bad ki Specialist ha ki District Hospital ban pyntikna ba ka jingai jingsumar ha ka koit ka khiah kan poi sha ki nongpang kiba don ha ki jaka ba kyndong tam khlem da lut ei ei.
Na ka liang u Dr. Batkupar Suting Medical Officer, Teleconsultation Zonal Hub Laitumkhrah u la ong ba ha ka por ba dang sdang ïa ka Teleconsultation ki don eh tang kumba phra haduh 10 ngut ki briew ba u syllok hynrei da ka jingnang tip ki briew shaphang katei ka jingshakri mynta ki la don haduh kumba 50 haduh 60 ngut ki briew kiba u hap ban syllok.
Katkum ka jingong jong ka Dr. R Lyngdoh, Joint Director (MCH&FW) ka la ong, “Ka Teleconsultation ka long ka jingkyrkhu ym tang na ka bynta ki nongpang kiba don ha ki bynta ba kyndong tam jong ka jylla hynrei ban pynsting ruh ïa ki jingtreikam ha ki jaka sumar kiba don ha ki distrik bad ruh ha ka nongbah jong ka jylla.” Shuh shuh ka ong ruh ba kane ka sienjam da ka sorkar jylla ka la ïarap bad pyntikna ruh ba ki nongpang kiba don ka jingshitom ba malu mala kin lah ban leit shah sumar ha ki sub centre kiba don hajan bad dei tang kito kiba kham shitom jur yn sa phah pat ia ki sha ki hospital kiba don ha ki distrik lane sha ka nongbah jong ka jylla.
Na ka liang ka samla Ibapynhun Wahlang, ka Mid-Level Health Provider (MLHP) kaba trei ha Umyiap sub-centre, West Khasi Hills, kaba peit kumba 4,800 ngut ki nongshong shnong ha kaba bun ki dei ki nongbylla sngi bad ki nongrep ka la ong ba kumno ki nongshong shnong ki hap ban leit haduh 15-20 kilometer bad ruh ban pynlut 500 haduh 1000 tyngka shi sienleit tang ban poi sha ka clinic doctor kaba jan tam lane ka hospital. Ka la ong ruh ba kane ka la buh ka jingeh kaba khraw ïa ki paidbah kiba im tang kumba 150-200 tyngka shisngi. Kumta ka la ong ba katei ka sienjam ka la long ka jingkyrkhu ïa kiba bun ki nongpang kiba la pynpaw ka jingsngewnguh ïa ka sub centre kaba la buh ïa katei ka teleconsultation.
Dang shen mynta u snem, ka Kong Bibidaris Mary Marngar, ka kmie jong ki hynriew ngut ki khun ka la ud ba ka suh kynsan ka met katba ka dang thmu ban thung jingthung ha kept. Hadien bam lah shah shuh ïa ka jingsuh ki bahaïing ki la pynkit ïa ka sha civil hospital ha kaba mardor la phah ïa ka sha NEIGRIHMS ban shah sumar. Kumta da kaba shim pisa kylliang na ki paralok bad ki bahaïing la pynkit ïa ka sha Shillong. Hynrei hadienka jingsumar katei ka longkmie kam shym la lah ban leit phah peit ïalade sha NEIGRIHMS lane sha District Hospital. Kumta ka la rai ban leit sha ka sub centre kaba don hajan ban ïoh ïa ki dawai bad ki jingsumar hynrei ka khlem khmih lynti ba ka lah pynban ban ïakren bad ki doctor lyngba ka telconsultation bad ïoh ruh wat ïa ki kyrteng jong ki dawai kaba ïadei bad ka jingshitom jong ka.
Mynta ka jingkoit jingkhiah jong ka, ka la nang ïohbor bad ka ju leit barabor sha ka sub centre ban pyntip lyngba ka teleconsultation ban syllok bad ki doctor.
Kumta na ka bynta ki nongpang kum ka Kong Bibidaris kiba dei na ki bynta ba kyndong tam jong ka jylla, ka teleconsultation ka la pynshisha ba kadei ka jingkyrkhu kaba khraw namar ym tang ba ki paidbah kim lut ei ei hynrei kim donkam ruh wat ban leit jngai ban ïoh lut ïa ki jingsumar ha ki hospital nalor ba ki ïoh ruh ïa ka kabu ksiar wat ban ïakren bad ki doctor specialist.

Leave A Reply

Your email address will not be published.