6 tylli ki Technical School, 23 ki skul, kumba 40,000 ngut ki khynnah pule shakri ki SDB

Shillong, Risaw 30: Ka Balang Catholic ha ka thaiñ Shatei Lam Mihngi jong ka ri India ha ryngkat lang ki khun jong u Don Bosco Bakhuid ha ka sngi u Blei ki la pynkut noh ïa ka jingrakhe ïa ka lyngkhuh snem ba 100 jong ka jingwanpoi ki 11 ngut ki riewniam ba kynthup ïa ki Phadar bad ki Brother na ka jingïasyllok Salesian of Don Bosco (SDB) ha kane ka thaiñ ha ka 13 tarik Kyllalyngkot 1922.
Ïa kane ka jingrakhe la pynlong ha Calvary jong ka Cathedral of Mary help of Christian, Laitumkhrah ha kaba u Apostolic Nuncio ne u nongmihkhmat jong u Pope sha India u Archbishop Leopoldo Girelli u la wan shim bynta kum u nongkñia kongsan ha ka lehniam ïa ka Mass Bakhuid ha ryngkat ka jingïadon lang ki Bishop jong ka thaiñ lam Mihngi ba kynthup ïa u Archbishop Victor Lyngdoh jong ka Shillong, Bishop Lumen Monteiro jong ka Agartala, u Archbishop Emiritus jong ka Guwahati u Archbishop Thomas Menaparampil, Bishop Stephen Rotluanga jong ka Aizawl, u nongmihbujli jong u Don Bosco ne u Rector Major jong ki Salesian u Fr Angel Fernandez Artime ha ryngkat ka jingshim bynta lang kiwei pat ki lyngdoh Sohblei bad da ki phew hajar ngut ki paid riewngeit.
Ha ka jingpharia ïa ka ktien u Blei u Archbishop Leopoldo Girelli u la kren lyngkot ïa ka jingïaid lynti ba jwat ki Salesian na bynta ban pynïar ïa ka hima jong u Blei bad u la ai ruh ïa ka jingai khublei ha ka kyrteng u Pope Franci kaba u la phah rah ktien lyngba jong u.
U la kren ruh halor ka jingieid kyrpang jong u Blei kat kum ka jingpule ba nyngkong ba la shim na ka Kitab Jingstad, ha kaba u ong ba u Blei um ju thew ju bat ïa ki khun jong u wat hadien ka jingleh palat ïa ki hukum jong u wat la u long uba khlaiñ bor tam ia baroh.
U la pharia ruh ïa ka jingpule ba ar ba la shim na ka shithi jong u Paulus sha ki Khristan ha Thessalonika, u Archbishop Leopoldo Girelli u la ong ba kat kum ka ktien jong u Blei la kdew shai ba u la thaw briew kat kum ka saiñdur kaba janai jong u bad u khot ïa ka jingduwai na bynta ban sngewthuh ïa ka saiñdur jong u Blei bad sot na ka Gospel jong u Mattheius u ong, “wad nygkong na ka hima u Blei”.
“Ngi ïohi ba da ka jingïakynduh u nongkhrong khajna bad u Jisu u la kylla long u briew uba thymmai, namarkata, donkam ba ngin kynduh man ka khyllipmat ïa u Jisu ba ngin lah ban phai sha ka jingkylla bamut,” u la ong.
U la ai ruh ka kyrkhu kyrdoh ïa ki phadar Salesian bad ki tnat jingïasyllok Salesian ba ki nang lah ban shakri ïa u Blei bad pynkut, “Khublei Shibun! Mithela!”.
Hadien ba la wai ka Mass Bakhuid u Archbishop Leopoldo Girelli u la pyllait paidbah ïa ka kot history jong ka jingïaid lynti ki Salesian ha kine ki 100 snem bad ruh ka jingpynher ïa ki baloon bad ka jingai sngewbha kyrpang na ki Salesian ïa ki Bishop bad ki nongshong khot sngewbha kyrpang.
Haba kren sha ki paid riewngeit ha ka ktien Italian bad kaba la pynkylla Khasi pat da u Fr Paul O Lyngkot u Provincial jong ka Shillong Province jong ki Salesian, u Rector Major ki Salesian u Fr Angel Fernandez Artime u la khot ïa baroh ban long kiba sngewnguh ïa u Blei ïa baroh ki kambah kiba u la leh lyngba ki atiar jong u bad ban long ruh ki nongrah khubor jong u Blei.
“Shlur bad Kyrmen ne Aude Et Spera ka phang pdeng jong ka kynhun ki Salesian kiba wan ïuhkjat nyngkong eh sha nongbah Shillong ha u snem 1922 bad ka kyntien im sngi jong u Bishop ba nyngkong eh jong ka Shillong Diocese u Archbishop Luis Mathias ka la ïeng sakhi ha kine ki sngi ïa ki kam bah u Blei da kaba pyndonkam ïa kine ki atiar jong u na bynta ban pynroi ïa ka bri sohwaiñ jong u”, ong u Phadar Paul ha ka jingïakren bad u Mawphor hadien ba la wai ka jingkñia ïa ka Mass Bakhuid.
“Ka Balang Catholics ha North East India ka la kiew shakhmat ym dei eh namar ka ka jingtrei shitom jong ngi hynrei ka dei namar ka jingïatreilang ka Balang ryngkat ka jingïasyllok Salesian”, u la ong.
Haba kylli ïa ki kam jong ka Salesian ha kane ka Shillong Province, u Phadar Paul u la ïathuh ba kumba long mynta ki don 6 tylli ki Technical School, 23 tylli ki skul bad ki don kumba 40,000 ngut ki khynnah skul kiba ki riewniam na ka jingïasyllok Salesian ki peit.
“Ki 100 snem ngi la trei na bynta ki samla bad ki 100 snem ban dang wan ngin nang kham pynjanai ïa ka jingshakri ïa u Blei ha ki samla bad ngin ïaleh ruh ban nang kyntiew ïa ki samla bad kum u Provincial nga ong ba ngi hangne ha Province jong ngi ngin bteng ban shakri kham bha shuh shuh ïa ki samla”, u la ong.
Ha kane ka jingrakhe ïa ka lyngkhuh snme ba 100 la wan shim bynta lang ruh da u Myntri Rangbah ka jylla u Conrad Sangma, ki myntri sorkar ba kynthup ïa u Bah Lahkmen Rymbui, Kyrmen Shylla, u CEM ka KHADC Bah Titos Chyne, ki MLA ba kynthup ka Kong Ampareen Lyngdoh, Bah AL Hek, Bah CV Diengdoh IAS bad kiwei dei ki heh sorkar bad ki nongmih khmat.
Kumban shu pyntip hangne ba ka balang Catholic hapdeng ki Khasi la wan bet nyngkong eh da ki Phadar German na ka jingïasyllok Salvatorian kiba la poi ha shillong ha ka 27 Rymphang 1890 hynrei dei na ka daw ka Thmabah ba nyngkong ki la hap ban mih noh a Shillong ha u snem 1915 bad la peit pat ïa ka Shillong Province ha kato ka por da ki phadar Jesuit na Kolkata naduh u snem 1915 haduh 1922 bad la shimti ban peit pat ïa ka Shillong da ki Salesian naduh u snem 1922 haduh u snem 1972.
Ka Shillong Province ha kato ka por ka kynthup ïa baroh kawei ka thaiñ Shatei Lam Mihngi jong ka ri India bad na ka Shillong Province mynta ki ïeng haduh 15 tylli ki jyllaniam bad da ki bun lak ngut ki paid riewngeit.