Ha ki rangbah aiti u CM ban plie ïa ki ar tylli ki ophis C&RD Block ha Ri Bhoi

Nongpoh, Jylliew, 26: U Myntri Rangbah ka jylla u Conrad K. Sangma ha ka sngi Palei u la plie paidbah ïa ka ophis building jong ka Bhoirymbong C&RD Block bad ka Umling C&RD Block kiba don ha Ri Bhoi District.
Ha Bhoirymbong C&RD Block, u Myntri Rangbah, u la ailad ha u rangbah ba la shongthaid na ka kam shipai,u Bah Colbert Shadap bad ha Umling C&RD Block la ailad ban plie ha u Bah Rani Maring, uba dei u nongput nongtem bad u nongshna ïa ki tiar tem tynrai.
Ka ane ka jingplie ïa ki jingtei ka Sorkar la synran lang da u Myntri ka tnat C&RD u Abu Taher Mondal, ki MLA ka Ri Bhoi ba kynthup ïa u Bah Damanbait Lamare, u Bah Charles Marngar, u Dr. Celestine Lyngdoh, u Bah Mayral Born Syiem, u Bah Sosthenes Sohtun lem bad kiwei ki heh ophisar ha ka jingdon ryngkat ki nongïalam shnong ba hap ha ki ar tylli ki C&RD Block.
U Myntri Rangbah haba kren ha kane ka sngi u la ong ba ka sorkar jylla ka don ïa ka thong ba hakhmat eh ban wan rah ïa ki kam pynroi hapoh ka jylla bad u la ong ruh ba kane ka sorkar ka treikam miet la bad sngi ban pynthikna na ka bynta ban pynurlong ïa ka jingangnud u paidbah ha kaba ïa dei bad ki kam pynroi bad ki jingkylla kiba dei ban paw ha kane ka jylla.
U la ong ba ka Ri Bhoi District ka dei ka District kaba donbok bha ha ka jylla, ba ka Kad Liengsuiñ ka don hapoh kane ka District bad ka sorkar ka la ïoh pdiang ïa ka song pisa kaba T. 500 klur ban pynheh ïa katei ka Kad Liengsuiñ kaba don ha Umroi kaba dei kawei na ka thong ka sorkar ban pynbun ïa ki Liengsuiñ kiba heh ban her kylleng ki jaka ka India na ka bynta ban ai jingmyntoi ïa ka ïoh ka kot ki paidbah ha Ri Bhoi bad ha ka jylla hi baroh kawei.
U la pynpaw ruh ba ki don haduh 46 tylli ki Building ba thymmai ki C&RD Block ha ka jylla ba ka jingtei ka dang ïaid shakhmat bad ba la mang haduh T. 135 klur na ka bynta ban pynbit pynbiang ïa ka jingtreikam sha ki paidbah lada don kita ki ophis treikam kiba biang bad kiba paka.
Shuh shuh, u la bynrap ruh da kaba ong, ba ka sorkar ka la dang mang tyngka ruh haduh T. 40 klur na ka bynta ban dang pynbit pynbiang ïa ki jingduna kiba don hapoh ki Block khnang ba ka jingtreikam kan long kaba ïaid beit ïaid ryntih bad ruh ban pynsuk ïa ka jingshakri na ka bynta ka jingdonkam ki paidbah, u la bynrap.