Ka jingshim rai ban kynthup ïa ka SD ha ka mang tyngka ka dei na ka daw ba shah pynduhkam ki nongtrei

Shillong, Jylliew 26: U EM ka KHADC uba khmih ïa ka tnat Pla Tyngka u Bah Seiborlang Warbah ha ka sngi Palei u la pynshai ba ka rai ban kynthup ïa ka supplementary demand ha ka mang tyngka kadei na ka jingshisha na ka daw jong ka jingshah pynduhkam jong katto katne ki nongtrei ha kaba kane ka kam ka dangsah hakhmat ka Ïingbishar.
Ïa kane u la ïathuh haba jubab ïa ka cut motion ba la wanrah hapoh ka dorbar lyuir ka council. U nongïalam ka liang pyrshah u Bah Titosstarwell Chyne u la pan ka jingpynshai halor ka rai ka EC ba kam dei ban pynbeit ïa ka jingbakla da kaba kynthup ïa ka supplementary demand na ka bynta ka snem 2024-25 hapoh ka mang tyngka kaba la wanrah.
“Kaei kaba pynlong ïa ka EC ba kam weng ïa ka supplementary demand napoh ka main budget. Phi tip kane kan thaw pynban ïa ka jingeh na ka bynta ka EC. Lada phi la weng ïa ka supplementary demand, kan ym don shuh kano kano ka jingïatai halor kane ka kam,” ong u Bah Chyne.
U Bah Warbah ha kawei ka liang u la jubab biang ha kajuh da kaba ong, “Naba kane ka kam ka dang sah hapoh ka iingbishar ngin ym lah ban leh eiei palat.” U Bah Chyne u la pynrem ïa u EM uba la jubab ban ong ba kam shym la don ka jingbthah napoh ka court ha kaba ïadei bad kane ka jingpynduhkam ïa ki nongtrei da kaba ong, “Baroh ngi tip ba ka Ïingbishar ka la pynsangeh ïa kane ka hukum ba la wanrah da ka EC ban pynduhkam ïa ki nongtrei ba la thung da ki EC barim.”
U la pan shuh shuh ka jingpynshai kiwei pat ki sienjam ka EC kan shim naba kane ka ktah ïa ki nongtrei kiba la sdang biang ïa ki kam ban trei hadien ba la pynmih ka Ïingkashari ïa ka hukum kaba shipor. Watba la tuklar u chairman ban ym dei ban ïatai shuh shuh ïa kane ka kam, U Bah Chyne u la banjur ba ka EC kan dei ban pynshai ïa ka ïing halor ki sienjam lada ïa kane ka case ka Ïingbishar kan ai ka jingbishar sha ka liang ki nongtrei ne ban pynksan ïa ki.
Halor kane u Bah Warbah u la ong ba ka supplementary demand kan sa shimkhia ïa kane ka kam lada ka jia kumba la ong da u LO.
Haba bynrap ïa ka jingjubab jong u, u CEM ka KHADC u Bah Shemborlang Rynjah u la ong, “Lada ka donkam ka EC kan sa wanrah biang sa kawei ka SD halor kane ka kam.