Shillong, Jylliew 26 : U MDC jong ka Sohiong Nongspung constituency Bah Synshar Kupar Roy Lyngdoh Thabah ha ka sngi Palei u la ïathuh ba haduh mynta ki dang don bun bha ki paidbah kiba ym pat shai bha haba ïadei bad ka jingtreikam jong ka Professional Tax jong ka Khasi Hills Autonomous District Council (KHADC).
Une u MDC jong ka Liang Pyrshah haba kren bad ki lad pathai khubor hadien ba la wai ka Dorbar Mangtyngka u la ïathuh ruh ba ki la don bun bha ki paidbah kiba wan ban kylli bad pan jingshai na u haba ïadei bad katei ka khajna kaba ki paidbah ki donkam ban siew. U ong ruh ba dei na kane ka daw ba ma u ruh u rah ban kylli lang ha Ïing Dorbar khnang ba ki paidbah kin shai.
Tangba, u ong pat ba haduh mynta wat ma u ïalade ruh um pat shai satia bad kumta kane ka long ruh ïa ki paidbah kiba ym sngewthuh ba naduh kiba la kamai katno ki hap ban siew ïa katei ka khajna bad katno ka dor kaba ki hap ban siew man la u snem.
“Kiba bun haduh mynta kim pat shai satia shaphang katei ka professtional tax. Ym tip ruh ba kito kiba treikam lajong kum ki kontraktor class 3 katno ki hap ban siew, ki class 2 katno bad ruh ki class 1 pat katno”.
Kumta u ong ba ka dei ka kamram jong ka Executive Committee ban pynkhreh bha ïa ka jubab khnang ba ki paidbah kin ïoh jingshai shaphang kane ka khajna.
U ong ruh ba kan bha ïa ka Executive Committee kan da pynkhreh bha khnang ban ïoh pynshai kham bniah ïa ki paidbah watla ka dei ha ka samoi ban wan ruh.
