Nongstoiñ, Jylliew, 26: Ka jingkhang khyrdep jong ki paitbah nongshong shnong ka Rwiang ïa ka Shree Shakambari Fero Alloys Private Limited, ka karkhana saiñ nar kaba don ha katei ka jaka naduh ka 13 tarik u Lber 2025 haduh mynta, ka la kynjoh sha ka lai bnai kynthih, ha kaba ki nongpynïaid jong katei ka karkhana, ki la shu sah ha ka lyngngoh.
Ki khubor ba la ïohlum ki ong ba ki la pyrshang ruh ban thaw ki buit ki lad kumno ban kyrpad ïa ki paitbah ba kin ailad ba kin plie biang. Hynrei haduh mynta ka sngi ki paitbah ka shnong Rwiang kim pat ai lad satia ban plie ïa ka.
Lah ban pynkynmaw ba hapdeng kine ki lai bnai u sordar jong ka shnong Rwiang ryngkat bad ki paitbah, ki la pynlong jingïalang la bunsien bun wat da kaba khot lang ruh ïa ki nongpynïaid jong katei ka karkhana, ban dawa na ki ba ki dei ban pynurlong shuwa ïa ki jingdawa jong ki paitbah shnong bad ba kin pynbit pynbiang katkum ka jingdonkam jong ki paitbah shuwa ba kin ailad ba kin plie biang ïa katei ka karkhana.
Nalor kata dang ha ka sngi hatmajai ba la dep ka dorbar shnong Rwiang ka la pynlong biang ïa ka jingïalang, ha kaba ki nongpynïaid jong katei ka karkhana saiñ nar ki la ïa don lang. Hynrei, wat la ka jingïalang ha katei ka sngi ka la neh palat saw kynta, pynban kam shym la poi haei haei ruh bad ka jingïalang ka la ïakut ba u sordar jong ka shnong Rwiang, ki paitbah nongshong shnong ryngkat ki nongpynïaid jong ka karkhana saiñ nar kin leit ban ïakynduh ïa u Deputy Commissioner jong ka West Khasi hills ban ïa pynbeit ïa katei ka kam.
Hynne ka sngi palei kumba la dep rai, u sordar jong katei ka shnong ryngkat ki paitbah ba la synran lang da u bah Moslandar Marngar President jong ka All Meghalaya Commercial Truck Owner & Driver Association lem bad ki nongpynïaid jong ka karkhana, ki la poi lang ha kamra treikam jong u bah Garod LSN Dykes Deputy Commissioner ka West Khasi Hills ban ïa kren halor katei ka kam.
U bah Moslandar haba ïakren bad u nongthoh khubor hadien ba ki la mih na ka kamra jong u Deputy Commissioner, u la ong ba ha katei ka jingïakren na ka liang u Deputy Commissioner um shym la ai kano kano ka rai. Namar ban plie ne ban khang ïa katei ka karkhana ka kamram ka dei jong ki paitbah nongshong shnong.
Nalor kata u la ong ruh ba kaba lyngngoh ka long ba na ka liang ki ophisar jong ka Meghalaya State Pollution Control Board, hadien ba katei ka karkhana ka la shah khang khyrdep, ki la wan ban jurip haduh arsien arwat bad ki la lap ba ka jingdon jong katei ka karkhana, ka la pynjaboh haduh katta katta ïa ka lyer bad kumjuh ruh ïa ka wah Rwiang.
Namar ba katei ka karkhana ka don harud jong ka wah bad ka jingpyntuid pathar ïa ka jaboh sha ka wah ka jur bha bad ka MPSCB, ka la pynshitom ruh ïa ki trai jong katei ka karkhana da kaba daiñ kuna haduh laiphew lak hynriew phew hajar tyngka.
U la ong ba kitei ki ophisar ka MPSCB ki la pynshai ruh ha ki paitbah nongshong shnong, ba kim dei satia ban shah pynbiej ha ki nongpynïaid jong katei ka karkhana lane kin shah pynthame da kano kano ka rukom. Pynban hadien katto katne por ka MPSCB ka la pynmih pat da ka jingpynbna ba katei ka karkhan ka dei ban plie noh.
Katei ka jingleh jong ka MPSCB ka pyni shai ba ka la shet kylla bad ñiew beiñ ïa ki paitbah nongshong shnong Rwiang. Na ka liang u sordar bad ki paitbah pat ki la ong ba kin sa shong biang ïa ka jingïalang ha kine ki sngi ban wan bad kin sa bishar bniah biang la kin shah ne em ban plie biang ïa katei ka karkhana.
