Shillong, Jylliew 26 : Ka Ïing Dorbar Thawaiñ jong ka KHADC ha ka sngi Palei ka la mynjur ia ka mangtyngka na ka bynta ka samoi treikam jong u snem 2025-2026 ha kaba ka jingmang ban ïoh lum ka tam da 5.24 lak tyngka ïa ka jingmang ban pynlut.
Na ka liang u Executive Member ka tnad Finance, Bah Seiborlang Warbah haba wanrah ïa ka Mangtyngka ha ka sngi Ba-ar u la ong ba mynta u snem ki la tyrwa ïa ka mangtyngka kaba 227.48 klur tyngka na ka bynta ban pynlut katba ka khajna kaba ki mang ban ïoh lum pat ka long 227.53 klur tyngka.
Shwa kane, u EM haba jubab halor ka jingïatai halor ka mangtyngka, u la ong ba ka Executive Committee ka la rai ban shim bun ki lad ki lynti bad ki sienjam na ka bynta ban pynkhlain shuh shuh ïa ka pla tyngka jong ka Council.
Katkum ka jingong jong u, ki don bun ki sienjam ban ïakhun ïa kane kynthup naduh ka jingpynduna ïa ka jingdon ki Executive Member bad ka jingpynduh noh ia kiba bun tylli ki advisory committee kiba pynlong ïa ka Council ban hap pynlut tam na ka bynta kine.
Kane ka mangtyngka kaba mynjur ha kane ka sngi kan dei eh khamtam na bynta ka tulop ki nongtrei bad kumjuh na ka bynta ki dkhot jong ka council la ka long naduh Chairman, Deputy Chairman, Nongïalam ka Liang Pyrshah, ki Executive Member bad ki nongtrei la ka long naduh ha ka Executive, Legislative bad ha ka Judicial Wing jong ka Council.
Tangba ha ka por ba don ka jingïatai halor ka mangtyngka, jan baroh ki MDC ka Liang Pyrshah kim shym la shong hadien ba u Chairman ka Council, Bah Strongpillar Kharjana u la pynbna ba dei tang kito ki dkhot kiba la dep ban ai kyrteng ha shwa ka 4 baje jong ka sngi Ba-ar kin ïoh ban shim bynta.
Kumta, da kaba bat ïaka rai kaba u la dep pynbna, ha kane ka sngi u la shah tang ïa kito ki san ngut ba la dep ai kyrteng kiba baroh ki dei na ka Liang Synshar ban shim bynta.
Na ka liang ki MDC ka Liang Pyrshah ki la mih noh iwei hadien iwei pat hynrei ki la rung biang pat ynda la khot ïa u Executive Member Finance ban jubab.
