Shillong, Jylliew 26: U Executive Member ka KHADC uba khmih ïa ka tnat Pla Tyngka u Bah Seiborlang Warbah ha ka sngi Palei u la kubur ba ka executive committee ba la ïalam da ka Voice of the People Party (VPP) ka mad ki jingshah tynjuh naba dang thymmai ka kam.
“Kan dei ka jingïakhun kaba heh bha na ka bynta kane ka EC ba thymmai naba ngi dang long kiba duna ban mad ïa ka kam. Hynrei da kaba don ka jingïatreilang ka la ïarap ïa ngi ban pynbeit ïa ki jingeh kane ka pyni ba dang ka jingïalong kawei ka la long ruh ka bor,” ong u Bah Warbah ha ka jingjubab jong u ïa ka mang tyngka ha ka sngi ba khatduh jong ka dorbar lyuir ka KHADC.
Ha kawei ka liang u la pynthikna pat ba ka executive committee kan pyrshang ban trei shitom ban kynjoh ïa ka thong.
U Bah Warbah, haba kubur ïa ka jingkyrpad halor ka jingdonkam ban pyndonkam bha ïa ki jingdon jingem ka council ula pynthikna ula pynthikna ïa ki jingleh ban pyndep ka kam u la ong, “Namar kata haba pynkhreh ïa ka mang tyngka ngi la rai ban pynthikna ba kan ym don ka jingpynlut kai ïa ka pisa.”
U la kdew ruh ba ha ki snem ba la leit, ki la don bun ki advisory committee ba la thung na ka bynta ki jingthmu bapher bapher hynrei ka jingthung ruh ïa kine ki committee ka la wanlang ruh bad ka jinglong kaba bun ba hap ban siew da ka council.
“Dei na kane ka daw, ngi la rai ban pynduna ka jingbun ki dkhot ka EC khnang ban pynduna ïa ki jinglut ki bym da donkam than. Ngi la pynduna ruh ïa ki jingdon ki advisory committee,” bynrap u Bah Warbah.
Haba ong ba kane ka EC kan bteng ïa ki kam ba bha kaba la ïalam da ka EC barim, u EM u la pynpaw ruh ba ka jingsiew online ïa ka professional tax ba la leh da ka EC barim kan bteng beit da kane ka EC ba mynta.
“Ngin pynthikna ba kane ka kam yn pyntreikam naba ngi sngew ba kane kan ïarap bha shibun ïa ka jinglum ïa ka khajna da ka council. Ngim kwah ban shim ka burom ïa ka jingtrei shitom ka EC barim hynrei ngi ai ka jingïaroh ïa ki jingpyrshang jong ki. Hynrei kane kam mut ban pynsangeh ïa ngi ban pynbha shuh shuh ïa ki policy ba la wanrah da ka EC barim namar ka kamram jong ngi ka dei ban buh ïa ka bha ka miat jong ka council nyngkong. Ki jingbakla ba la leh da u Adam kin ym long ne dei kiba lah ban leh biang da ki khun bad ka pateng ban wan.”
U Bah Warbah u la banjur ïa ka jingdonkam ban kyntiew bad pynbha ïa ka jingdon ka pisa ka KHADC da bynrap, “Khnang ban kynitew ïa ka jingdon ka pisa ne ka jinglum khajna ka council, ngi donkam ban pynlut da ka jingstad.”
Na ka liang u EM u la pynbna ruh kumjuh ba ka EC ka la rai ban thung ïa ka recruitment committee ban pynbha ïa ka rukom thungkam thungjam ka ban long katkum ka jingmynjur jong Comptroller Auditor General of India (CAG).
“Namarkata ka jingpynbeit thymmai ïa ka rukom thungkam thungjam ka dei ka por kaba lah donkam bha mynta na ka bynta ban ïoh ïa ka rukom treikam kaba khuid bad kaba beit ha ka jingtreikam jong ka council,” u la bynrap.
