Ha ki kut ïing da ka pisa bad blanket ki thmu ban par tuh bad pynbiej : ong u Bah George ha ka sngi thep kyrteng

Nongpoh, Rymphang 04: U Bah George Lyngdoh u kyrtong ka Meghalaya Trinamool Congress na Umroi Constituency, u la ther tyngeh halor ka jingdon ki kyrtong kiba thmu ban par tuh bad pynbiej ïaka jingmut jingpyrkhat jong ki briew da ki blanket bad 5000 ka pisa sha ki thliew ïing ha Umroi Constituency, khlem da jer kyrteng namar ki paidbah ka Ri-Bhoi bad ka Umroi ki tip shai ïa kata, haba kren sha ki lad pathai khubor hadien ka jingthep kyrteng ban aireng ïaka elekshon sha ka ïing Dobar thawaiñ ka jylla haka sngi Saitjaiñ.
“Kim don lynti shuh da kumwei bad dei tang kane ka lynti ban shu thied ïaki paidbah da ka pisa bad ka blanket, bad kaba kham sngewsih shuh shuh ka long ba ki mut ban thied syndon ïaka nongrim jong ka lawei ka Ri-Bhoi District” la ong u Bah George da kaba bynrap ba kum ki paidbah ka dong Ri-Bhoi kila dep mad ïaki jingeh ki jingjynjar haki por bala leit noh khamtam haka por khangdam naka jingwan lyngshop ka khlam Covid-19, hynrei mano ba wan ai khaw? Mano ba ïarap ïaka bai bording? Ki jingdonkam jong ki paidbah hynrei kaba sngew thamula ba kita ki nongïarap ki mih ha kum kane ka por elekshon ban pynbiej ïaki paidbah da ka tyngka pliah bad ka blanket.
Naka liang u Bah Goerge Lyngdoh u la pynpaw ïaka jingsngewnguh ïaki paidbah jong ka Umroi ba ki la ailad ïa u ban long kum u nongmihkhmat sha ka ïing dorbar thawaiñ jong ka jylla ha kine ki 5 snem ba la dep. U la ong ruh ha kine ki 5 snem ba ladep kum u nongmihkhmat u la ioh ban wan rah shibun ki jingkylla bad ki kam pynroi hapoh ka constituency bad ki dang don ruh ki kam kiba dang sah kut.
Haba kylli la ki paidbah jong ka Umroi ki shañiah haka party TMC hadien ba u la mih noh naka party Congress, u Bah George u la jubab ba ka jingmih noh naka party Congress kam don jingthud eiei bad ka dei ka jingsyllok lang ryngkat bad ki nongïalam bad hakajuh ka por ka dei ruh halor ki daw jong ka jingjia haka jylla, hynrei ka jing pynmih kyrtong ka TMC ha kane ka kynti ba mynta kumba 54 ngut naki constituency bapher bapher watla tang khyndiat bnai ka jingwan longdoh jong ka party haka jylla ka pyni ba ki paidbah ki don ka jingshañiah ha kane ka party namar ba kane ka party la ïeng skhem hala ka nongrim da kaba trei daki kam ym tang daka ktien, bad kum ki paidbah ka Umroi ki sngewthuh shai ba ka party TMC ka dei kaba trei ïaka kam kumba kala kular ban pyndep ïaki lada wan haka bor namar ka Umroi Constituency kam dei shuh ban jied tang ïa u nongmihkhmat hynrei u nongïalam haka jylla.
U la ong ruh ba ka party TMC ka dei kaba la suhthied haka jylla bad kaba pynpaw lyngba ki kam kumba ki nongïalam kila leit ruh ban ïeng ha ïngdorbar ban dawa ïaka ktien Khasi bad Garo haka khyrnit ba 8 jong ka riti synshar, bad ym don kano kano ka party haka ri India kaba ngi kum ki khristan ngi ioh ban pynphuh pynphieng ban rakhe ïaka Khristmas bad dei tang ka TMC kaba ju iai rakhe ïaka Khristmas bad ki paidbah bad nga ngeit skhem u briew u ba don ka jingïatip lem nga tharai kin nym phai shuh shawei ha Umroi Constituency, u la bynrap.