Nongpoh, Nailur 20 : Ka jingïakynad hapdeng ki nongshong shnong ka Maikhuli, Ri-Bhoi bad ki briew na Assam ka la jia biang ha ka sngi Saitjain hadien ba ki briew na Assam ki la shna jingker bad khang tala ïa ka lynti shnong kiba pynïasoh bad ka madan Shnong. Kane ka jingïakynad ka la poi shaduh u pud ba ki longkmie na Maikhuli kin ïakynrup marmet bad ki longkmie nong Assam.
Kane ka jingïakynad ka la jia ha ka por 10:30 baje mynstep da ka jingwan rung ki briew na Assam ban ker siej ïa ka lynti ban rung sha madan Shnong bad kawei pat ka lynti ïaid paidbah nalor ka khang tala. La kynnoh ruh ba ka la don ka jingpynpra ïa ka kynroh skul bad ka jingker da kaba pyndonkam da ka kali puh shilum.
Kat kum ka khubor la ïathuh, haba ki longkmie na Maikhuli ki la ïohi ïa kane ka jingleh donbor, ki la leit mar mar sha katei ka jaka ban ïakren pynban ka la mih ka jingïania kaba jur bad poi sha ka jingïakynrup mar met hapdeng ki arliang mamla.
Hapdeng ka jingïakynad kaba jur, ki nongshong shnong bad ki Longkmie ka Maikhuli, ki la mih paidbah bad ki la leit ban kyndang ïa kine ki jingker bad ki tala.
Ki bor district haba ïoh jingtip ïa kane ka jingjia, ki la phah mar mar ïa ki Pulit sha ka thaiñ ban tehlakam ïa ka suk ka saiñ. Ki Magistrate ba kynthup ïa u N Hajong, u Akash Marak bad M Marngar nalor u Addl SP P Baida, u OC ka Kharnapara bad Pillangkata ki la poi sha kane ka shnong khappud ban pynjai jai ïa u paidbah.
Ki nongïalam sengbhalang ba kynthup ïa ka FKJGP Raid Marwet hapoh ka jingïalam u President Denis Nongrum, ki la hiar sha katei ka shnong ban ai jingshngaiñ ïa ki paid Maikhuli.
Haba kren sha ki lad pathai khubor, ki nongïalam ka Seng ki la ai jingïaroh ïa ka jingshlur jong ki longkmie ka Maikhuli, kiba la mih shakhmat ban ïada ïa u pud u sam ka Jylla bad ban khanglad ïa ki briew na Assam ban kyntur pud.
Ki nongialam ka seng ki la kyntu ruh ïa ka Sorkar ban shim khia mardor ha ka ban pynbeit ïa u pud u sam ba thikna ha Maikhuli bad ban pynkhlaiñ ruh ïa ka jingdon ki bor Pulit ha ka thaiñ khnang ba kin lah ban ai jingïada ïa u paidbah.
