Jowai, Rymphang 05: U kyrtong ka seng Congress hapoh ka 4-Mowkaiaw Constituency u la ioh ban pdiang burom ia ki spah ngut ki ki nongkyrshan barim ka seng UDP na kylleng ki shnong kiba don haka thaiñ Shilliang Myntang bad thaiñ Barato.
Ha kane ka sngi, la ïoh ban pdiang burom ïa kine ki nongkyrshan barim ka UDP da u Kyrtong ka seng Congress u ma Nehemaya Tyngkan hynnin ka sngi saitjaiñ ha Community Hall Iooksi Iapkhla, ha kaba la pynkup burom ruh ïaki kum ka dak ba ki la pynïasoh sha ka seng Congress.
Ha kane ka sngi la ïoh ïaka jingkren na u Justice Paul Lyngdoh, u ma Damki Suchiang Waheh Chnong Khatkasla, ka Esyndet Dkhar naka shnong Barato, u ma C. Tangliang Waheh Shnong Iooksi Iapkhla bad na u Kyrtong ka Congress u ma Nehemaya Tyngkan, ïaka jingïalang la pynïaid da u Titos Shadap naka shnong Barato.
U ma Damki Suchiang uba dei ruh haka juh ka por u nongkyrshan barim ka NPP, haba ai jingkren, ula ong ba ka daw ba u ai jingkyrshan ïa u ma Nehemaya Tyngkan, kadei namar ba u kwah ban kyrshan para baduk para rangli, para bym don spah don phew bad para barit baria.
Shuh shuh u ma Damki Suchiang ula kyrpad ruh ïaki paidbah ban nym khmih lynti ïaka bai sha bai dud, ka bai dawai dashin lane wat nym pan pisa na u Kyrtong , hynrei phi dei ban ïeng shkem haka nongrim khlem da shah pynbiej naka bynta ban pynjop donburom ïa u ma Nehemaya Tyngkan.
Katba u ma Nehemaya Tyngkan pat ula ai khublei kyrpang ïa baroh ki nongkyrshan barim ka UDP kiba la wan ban pynïasoh sha ka Seng Congress naka bynta ban ai jingkyrshan pura ïa u.
“Haka Elekshon ba la dep nga la rem salit, dei namar ba ka dei ka sieñ nyngkong ïanga, bad ngam da shemphang bha ban ïaid lynti, hynrei mynta, bun ki buit treikam nga la don bad nga lah ban pyntikna ba ngan sa ïoh ban kheit ïa u soh jingjop” la ong u ma Nehimaya Tyngkan.
Haba kyrpad ïaki nongkyrshan ban trei shitom naka bynta jong u, u la ong ba u kyrpad ïaki nongkyrshan ban long kiba shkem ka nongrim, ym dei ban shah pynbiej ne shah pynthame hano re hano.
