Pynshai u Bah Shemphang Lyngdoh ba mih ka jingkynthoh kawang ktieh shi kynum pyrshah ïa u Dasakhiat Lamare

Nongpoh, Rymphang 05 : U Bah Shemphang Lyngdoh kyrtong ka NPP na Mawhati Constituency mynta ka sngi u la mih shakhmat ban pynshai paidbah hadien ba mih ka jingkynthoh kawang ktieh shi kynum ha kaba ïadei bad ka jingkren hynnin ka sngi hadien ka jingthep kyrteng ban aireng haka elekshon sha ka ïing Dobar thawaiñ ka jylla.
Haba kren sha ki lad pathai khubor mynta ka sngi, haka jingdonlang ki nongïalam NPP na Mawhati, naka liang u Bah Shemphang Lyngdoh u la pynshai ba ka jingkren jong u hynnin ka sngi sha ki lad pathai khubor ka dei ka jingkren salonsar bad kyllum haki 50 snem bala leit noh ba ka Mawhati Constituency ka dei kaba sahdien tam hynrei bun naki paidbah ki sngewthuh bakla bad kynthoh ruh ba ka jingkren jong u ka dei ka jingkawang ktieh ïa u kynum lajong u Bah Dasakhiatbha Lamare u ba la shakri ïaka Mawhati Constituency kum u MLA ha kine ki 5 snem.
U la ong ruh ba u Bah Dasakhiabha Lamare u ba dei u kynum jong u, bad haka jinglong MLA jong u, u la leh shibun ki kam ban wanrah ïaka roi ka par haka thaiñ Mawhati naduh ki surok, ki jaka pule, ka koit ka khiah bad kumta ter ter kaba ym pat ju ioh nongmihkhmat ban shimkhia naka bynta ka jingeh jong ki paidbah bad kumba long haduh mynta u Bah Dasakhiatbha Lamare haka jinglong MLA jong u, u la wanrah palat 300 klur ki skhim pynroi haka thaiñ Mawhati kaba dei ka jingkyrkhu kaba khraw ïaki paidbah jong ka Mawhati baroh kawei.
Na ka liang ki riew rangbah ba kynthup ïa u Bah Shanbor Shadap, Bah Koren Manih kiba dei ki nongkyrshan bad nongïalam ka PDF bad MCPC bad kiba la leit ban kyrshan ïa u Bah Shemphang Lyngdoh kila ai ka jingkyrshan ïaka jingkren jong u Bah Shemphang da kaba bynrap ba u Bah Dasakhiatbha u la lehbha ïaka Mawhati bad ka jingkynnoh ba ki paidbah ka Mawhati ki dei kiba biej, kim lah ban pdiang bad kum ki paidbah kin ai beit ka jingkyrshan ïa u Bah Shemphang ba un ioh ka jingjop ha kane ka elekshon ban wan na Mawhati.