Nongpoh, Nailur 23: Ki pulit ka Basistha Police Station lem bad ki pulit ka Jorabat, ki la ïoh ban kem ïa uwei u suba nongkhaïi drok bad kurup ïa u heroin ba shongdor 2 klur tyngka na kawei ka trok dumper ha Jorabat .
ïa une u briew la ïoh kem ha ka janmiet 21 tarik Nailur ha ka por 4 baje janmiet. Katkum ka jingïathuh uwei u heh pulit ka Basistha Police Station, ki pulit ki la ïoh jingtip kaba bniah shaphang kawei ka trok kaba wan na Manipur bad kaba la suba ba kit ïa u drok uba thmu ban pynpoi sha Guwahati.
Hadien ka jingïoh ïa katei ka jingtip, ki pulit ki la pynlong ïa ka jingpynap shrip ha Jorabat, ha kaba ki la ïoh ban bat ïa katei ka dumper kaba don ïa u registration number AS 01 GC 7487.
Ïa katei ka dumper la ñiah da u Mohammad Fariuddin, uba dei na jylla Manipur. Hadien ka jingtalasi kaba bniah ïa ka kali, ki pulit ki la lap ïa u drok uba la buhrieh bha hapoh ka khrum jong ka dumper ba la song hapoh ki 20 tylli ki synduk sabon uba don ka jingkhia haduh 262.39 grams bad la antad ba ka dor jong une u drok ka poi sha ka 2 klur tyngka.
Ki pulit ki dang pynlong ïa ka jingtohkit ban lap ïa ka jingïadei bad kiwei pat ki briew kiba lah ban don bynta ha ka jingkit ïa une u drok bad ka jingtohkit ka dang ïaid shakhmat.
