Pynlong ka JMB da ka Lok Kalyan Mela 2026 ban ai jingtip sha ki nongdie rud surok halor ki skhim sorkar
Jowai: Ka ophis jong ka Jowai Municipal Board (JMB) mynta ka sngi kala pynlong ïa ka prokram ‘Lok Kalyan Mela, 2026 cum Awareness Programme’ na ka bynta ki nongshongdie rud surok jong ka sor Jowai, kaba long shi bynta na ka jingïalap ba kyrpang hapoh ka skhim PM SVANidhi Scheme. Ïa kane ka prokram la pynlong ha Chutwakhu Community Hall, Jowai.
Ka jingthmu jong kane ka prokram ka long ban pynsngewthuh hapdeng ki nongshongdie rudsurok shaphang ki jingmyntoi kiba lah ban ïoh lyngba ka skhim PM Svanidhi bad kiwei de ki skhim jong ka sorkar pdeng (Central Government Welfare Schemes), ha kaba la hikai ruh ïa ki kumno ban ïoh ia kine ki jait skhim.
Ka kong D.V. Lyngdoh, Additional Deputy Commissioner bad ka Chief Executive Officer jong ka Jowai Municipal Board ka la kyntu ïa baroh ki nongioh bynta ba ki dei ban pyndonkam ïa kane ka skhim. Ka la ong ba kino kino ki bym pat don jingtip ei ei shaphang kane ka skhim kin sngewbha ban ïakynduh ïa ki tnad sorkar ba dei peit ban ïoh ïa ki jingbatai bad jingïarap shaphang ki skhim sorkar bapher bapher kiba pyntreikam da ki tnad sorkar bapher, khnang ba kin ïoh ïa ki jingïarap.
Ki nongmihkhmat na ki tnad bapher bapher kila wan ban ai jingtip shaphang ki skhim bad jingmyntoi bapher bapher na ka bynta kine ki nongshongdie rud surok. La buh ruh ïa ka Information Stalls ha kane ka Mela, khnang ba ki briew kin ïoh ban pan jingtip bad jingshai.
Ki tnad sorkar kiba la wan ban don bynta ha kane ka Mela ki kynthup ïa ka Lead District Manager / Branch Manager State Bank of India, ka Labour Department, ka Civil Supply, ka District Medical & Health Officer, ka District Social Welfare bad ka Food Safety and Standards Authority of India (FSSAI).
Kham hashwa jong ka jingïalang la ïoh ïa ka jingkren pdiang da ka kong Ripa Kjam, City Mission Manager P.M. Svanidhhi, katba ka kong Emisamantha Rymbai Community Organizer, P.M. Svanidhi ka la ai ïa ki kynthien ai khublei shwa ban pynkut ïa ka prokram.