Ka Sorkar Pdeng kan shimkhia ïa ki mat ba sahteng, ong u Sambit Patra hakhmat ki 8 ngut ki MLA ka UDP

By Mawphor Editor On Sep 24, 2026

Shillong, Nailur 23 : U National Spokesperson ka BJP u Sambit Patra ha ka sngi Balang ula ong ba ka Sorkar Pdeng kan sa shimkhia ban khmih ïa ki katto katne ki ishu ba kongsan kiba dei jong ka Meghalaya kynthup ka jingpynrung ïa ka ktien Khasi bad Garo ha ka Khyrnit ba Phra ka Riti Synshar, Amendment jong ka Meghalaya Residents Safety and Security Act (MRSSA), ka kam tih dewiong bad ka jingpynkynriah ïa ki Sikh na Them ïew Mawlong.
U Patra ula pynpaw ïa kane haba kren ha ka jingïalang ha Headquarter ka BJP ha New Delhi hadien ka jingwan ïasoh ki 8 ngut ki MLA ka United Democratic Party (UDP) sha ka BJP.
Haba kdew ïa ka jingkren u Myntri ka Sorkar Pdeng Kiren Rijiju ha ka jingïalang, u Patra ula ong ba kine ki MLA kila wan ïasoh sha ka BJP hadien ka jingsakhi ïa ki kam pynroi kiba la leh da ka Sorkar NDA hapoh ka jingïalam u Myntri Rangbah Duh ka Ri Narendra Modi.U ong ba ka thaiñ Shatei Lam Mihngi ka la sakhi ïa ka jingkylla kaba khraw bha naduh usnem 2014.
“Shuwa u 2014, ïa ka Sorkar Congress, NE-North East- ka mut ka bym don satia. Hadien ba wan u Modi, NE ka kylla long ka engine ka jingkiew shaphrang ka India. Na ka jingbym don sha ka engine ba thymmai, kane ka dei ka jingkylla kaba khraw eh ïa ka thaiñ Shatei Lam Mihngi” ong u Patra.
U ïathuh ba ka jingïakren bad ki phra ngut ki MLA kala ïaid eh halor ka roi ka par bad ki saw tylli ki ishu kiba kongsan kiba ktah ïa ka Meghalaya.U Patra ula ong ba ka jingdawa ban pynrung ïa ka Ktien Khasi bad Garo ha ka Khyrnit ba Phra ka dei kawei na ki mat bala mih ha ka jingïakren.
“Sabka Saath, Sabka Vishwas bad Sabka Vikas ka ïohi ïa kane kum ka kabu ban burom ïa man ki ktien ki thylliej hapoh ka thaiñ Shatei Lam Mihngi bad man ki jaidbynriew riewlum ha ka thaiñ” ula ong.
U Patra ula ong ruh ba ka Sorkar ka la khmih ïa ki ishu kiba ïadei bad ka jingpynkylla ïa ka MRSSA bad ka jingtih dewiong.
Halor ka kam ban pynkynriah ia ka Them Metor, u Patra ula ong ba ka jingïakren la pynlong bad u Myntri ka kam ïada ri Rajnath Singh.
Ula pynpaw ïa ka jingsngewskhem ba kine ki mat jingdawa yn sa pynbeit hapoh ka jingïalam u Myntri Rangbah Duh Narendra Modi bad u Myntri Rangbah ka Jylla Conrad K Sangma.
Ki 8 ngut ki MLA ka UDP ki la pan ïa ka jingkular na ki nongïalam ka BJP halor ki ishu bapher bapher ka Jylla hashuwa ba kin shim rai ban wan pynïasoh sha ka party.